Visoneka via Vakua Kilistu via ciNgelengu via handeka cikuma hali Mbanambasa na kapostolo Paulu. Ava vamala va puile tuniungi va ku zinguluka, va kele na ku meneka vikungulukilo via ku ntsimbu yavo. Omo lia vika? Muomu va tondele ku kuasa vamuanaye muli Kilistu. Paulu ua handekele ngueni “tu hilukenu na ku hinduisa vamuanetu” linga va ka va mone vati vali. Kapostolo Paulu ua ndiangele mangendzi a ku liseza-seza linga a ka kaniamese lutsilielo lua vamuanaye. (Vilinga 15:​36) Eci cikeco cizango ci ve ku panga naco tuniungi va ku zinguluka lelo lino.

Ve ku-iza mu ku tu kaniamesa. Nkala kaniungi ua ku zinguluka ue ku zinguluka mu vikungulukilo vi heta ku 20, mu cikungulukilo na cikungulukilo ue ku kalamo simano imo, luvali mu muaka. Tue ku uana ku kaniama omo lia ku kolesa cavo na vampuevo vavo nga va ambata. Ve ku lihakela kapandi ka ku tantekeya vanike na vakuluntu mu cikungulukilo. Cikuavo naua ve ku kala na ndzolela ya kuya netu mu cipanga ca kuambulula na ku vilongesa vietu via Mbimbiliya. Tuniungi vaku zinguluka ve ku tala vati cikungulukilo cili na kuenda hamo na vakuluntu va mu cikungulukilo kaha ve ku tu kaniamesa mu ku hana vimpande via ku tu ku vikungulukilo na ku viuano.​—Vilinga 15:35.

Ve ku muesa cilemo kuli vose. Tuniungi va ku zinguluka va kala mpundu na cizango ca vutuntu ca ku tantekeya vati vikungulukilo vili mu lutsilielo. Ve ku likungulula na Vakuluntu na vakua ku kuasa vipanga linga va mone vati cikungulukilo cili na ku kola na ku va mamuna vati va hasa ku puisamo viteli viavo. Kaha ve ku kuasa vapioneiro linga va kale na ndzolela mu kuambulula cavo, kaha ve ku tonda ku tantekeya vantu va vaha na ku mona ku suena cavo mu lutsilielo. Nkala umo ua ava vamuanetu ue ku lihana ngue “mukuasi kuli etu.” (2 Kolintu 8:​23) Tua pande ku tambuluisa lutsilielo luavo na ku lihana cavo kuli Njambi.​—VaHevelu 13:7.

• Omo lia vika tuniungi va ku zinguluka ve ku meneka vikungulukilo?

• Ku vezika cika u hasa ku uana mu ku meneka cavo mu cikungulukilo?