Yesu mua kele ku hiehi na ku tsa ua handekele ngueni: “Zimpande ezi vene zia cili zia vuangana va ka zia ambulula ku vifuti viose, zi ka pua vukaleho vua va kua vifuti viose; amba vuose ku kotoka ca mavu ci keza.” (Mateo 24:14) Vati cipanga eci ca ku ambulula ci ka heta ku mavu ose? Noho mu ku kavangeya lungano lua tu sila Yesu mua kele hano ha mavu.​—⁠Luka 8:1.

Tue ku endela vantu ku vindzivo viavo. Yesu ua longesele vandongesi veni ku ambulula ku ndzivo na ndzivo. (Mateo 10:11-​13; Vilinga 5:​42; 20:​20) Vakua Kilistu va ku livanga va li tepelele membo, mu va kele na ku ambuluila. (Mateo 10:​5, 6; 2 Kolintu 10:​13) Na lelo lino cipanga cetu ca ku ambulula va ci tumbika mua cili, vikungulukilo viose vie ku tambula membo a ku ambuluila. Eci ce ku tu kuasa ku puisamo lisiko lia Yesu lia “ku ambulula ku vantu na ku zimbula vukaleho.”​—⁠Vilinga 10:42.

Tua lihakela kapandi ka ku ambulula ku vantu vose. Yesu ua tu sila lungano, ua kele na ku ambuluila kuose kua kele vantu vavengi, ku mukulo ua visali na mu membo. (Mako 4:1; Yoano 4:​5-​15) Netu tue ku handeka na vantu kuose ku tue ku va uana​—⁠mu vitapalo, ku vitanda via mingoso, na ku hitila mu vitelefone. Tue ku ambuluila naua kuli vaze va tua tunga navo. Tue ku lilongesa navo ku visikola na vaze mu tua pangela hamo na ku vavusoko vuetu. Ku hitila mu vinjila via ku liseza-seza via ku ambulula, makulukazi a vantu va nevu “vimpande via cili via vuovole”.​—⁠Visamo 96:​2, NW.

Ku u tondo ku ambuluilako vakueni vimpande via cili via Vuangana vua Njambi linga navo va kovoke ni? Kati u li tulikile ino mizimbu, lekako vakueni!

• Vika via pua “vimpande via cili” vi tua pande ku ambulula?

• Vati Vakaleho va Yehova ve ku suama lungano lua Yesu mu ku ambulula cavo?