Vantu vavengi va likela kuya ku vi tembele viavo, muomu ka ve ku uana vi kumbulula via seho ku visoti viavo. Omo lia vika u na pande ku ka mona vati Vakaleho va Yehova ve ku lemesa? Vika u ka monako?

Ndzolela ya ku kala ha kati ka vantu va ngozi na cilemo. Vakua Kilistu va ku livanga va kele na ku likungulula mu ku lemesa Njambi, ku lilongesa Mbimbiliya na ku likolesa umo na mukuavo. (VaHevelu 10:24, 25) Va kele na ku viukilila mu cilemo, ha kati ka va vusamba va cili​—⁠vamuanaye mu ku tsiliela. (2 Tesalonika 1:3; 3 Yoano 14) Ngeci mua Vakua Kilistu va ku livanga, Vakaleho va Yehova ve ku-ivua ndzolela ya kama mu ku likungulula cavo.

Ku vezika ca kala mu ku niunga masiko a Mbimbiliya. Ku ntsimbu ya ku nima, vamala, vampuevo na vanike va kele na ku likungulula mu ku lilongesa via Njambi. Na lelo, valongesi vaze va tantekeya mua cili Mbimbiliya, ve ku tu longesa vati tu hasa ku niunga masiko a Njambi mu miono yetu. (Ndeutelonomi 31:12; Nehemiya 8:8) Vose ve ku yako vali na mpoko ya ku kumbulula ha vimpande via mbunga na ku imba, eci ce ku kolesa cikuma ku-lavelela cetu muli Kilistu.​—VaHevelu 10:23.

Ku vezika ca kala mu ku kolesa lutsilielo luove muli Njambi. Kapostolo Paulu ua lekele cimo cikungulukilo ca ku ntsimbu yeni ngueni: “Muomu nji hianga cikuma ku mi mona linga, . . . tu likolese umo na mukuavo na ku-tsiliela, cenu na cange.” (Loma 1:11, 12) Ku likungulula ntsimbu yose na vamuanetu, ce ku kolesa lutsilielo luetu na ku tu kuasa ku niunga masiko a Njambi.

Tua ku lania u ka kunguluke netu linga u ka li muene, viuma evi vi u na tande hano! Va ka ku tambula na ndzolela ya kama. Ka ve ku fuetesa.

• Lungano luka tue ku kava mu ku kunguluka cetu?

• Seho ika ya kala ha ku likungulula hamo na Vakua Kilistu?