Mu Mbimbiliya va sonekamo vivunga vivali via vamala Vakua Kilistu ve ku niunga viteli via mu cikungulukilo​—“vakuluntu na vakua ku kuasa vipanga.” (Filipu 1:1, NW) Mu cikungulukilo mua kala vakuluntu na vakua ku kuasa vipanga vavengi. Vika ve ku linga vakua ku kuasa vipanga mu cikungulukilo?

Ve ku kuasa civunga ca vakuluntu. Vakua ku kuasa vipanga va pua va ku kaniama mu lutsilielo, vakua vusunga, vakua ku silikinia vamo va pua vanike vakuavo vakuluntu. Ve ku tala vipanga via mu cikungulukilo. Eci ce ku kuatesa vakuluntu va cikungulukilo ku tuala mana ku ku longesa na ku niunga cikungulukilo.

Ve ku linga vipanga via ha mavoko. Vakua ku kuasa vipanga vamo va va hana cipanga ca ku tambula vose ve ku ya mu ku kunguluka. Vakuavo ve ku panga ku visandzi, ku tepela mikanda, ku niunga zimbongo, na ku tepela vihela via ku ambuluila kuli vandolome mu cikungulukilo. Vamo naua ve ku tala via ku komba Ndzivo ya Vuangana. Vintsimbu vimo vakuluntu mu cikungulukilo ve ku tuma vakua ku kuasa vipanga linga va ka hane vukuasi ku tusinakazi. Vakua ku kuasa vipanga ve ku tava na cizango ca vutuntu vipanga viose vi ve ku va hana mu cikungulukilo, ngeci va va singimika kuli vamuanetu vose mu cikungulukilo.​—1 Timoteo 3:13.

Ve ku hana lungano lua cili mu ku pua vamala Vakua Kilistu. Vakua ku kuasa vipanga ve ku va hanguila omo lia vilinga viavo via cili mu lutsilielo. Mu ve ku va hana vilongesa mu cikungulukilo, ve ku kaniamesa lutsilielo luetu. Omo ve ku tuamenena cipanga ca ku ambulula, mu cikungulukilo ve ku tu hana ntuima ya ku tualelelaho. Omo lia ku pangela hamo na vakuluntu, ve ku neha ndzolela na kuli tavasiana mu cikungulukilo. (Efeso 4:16) Mu ku hita ca ntsimbu, navo ve ku hasa ku heta ku vukuluntu.

• Vakua ku kuasa vipanga va pua vamala va cifua cika?

• Vika ve ku panga vakua ku kuasa vipanga mu cikungulukilo linga viuma vi ende mua cili?