Vakaleho va Yehova vangahi ua tantekeya? Halumo vamo vetu va tunga nove, mua pangela hamo ni mue ku lilongesa hamo ku sikola. Halumo tua simutuilile nove via mu Mbimbiliya. Yetu veya mpundu? Vika tue ku lekeselako vakuetu vize vi tua tsiliela?

Tu vantu, ngeci mua vose. Tua fuma ku visemua via ku liseza-seza, ku vihutu na vampite. Vamo vetu va kele mu vitembele vieka, vakuavo ka va tsilielele Njambi. Tele kanda tu ci pue Vakaleho va Yehova tu vose tua lilongesele Mbimbiliya, tua hiluile mua cili vilongesa viayo. (Vilinga 17:​11) Tua tavele viose vi tua lilongesele ngeci tua hangula ku pangela Yehova Njambi.

Tua uana ku vezika mu ku lilongesa Mbimbiliya. Ngeci mua vantu vose, netu tue ku hita mu visoti kaha tu vakua ku zeya. Vunoni omo lia ku-ononoka ku masiko a Njambi tangua na tangua, cifua ca miono yetu cina aluluka. (Visamo 128:​1, 2) Ngeci tue ku lekako vantu vose viuma via cili vi tua uana mu ku lilongesa Mbimbiliya.

Tue ku-ononoka ku masiko a Njambi. Ngue mu va soneka mu Mbimbiliya, masiko aco a longesa vantu ku kala na kasingimiko, ngozi na vusunga. Masiko a Njambi a kuatesa vantu mu membo linga va litavasiane, na ku kala na vilinga via cili linga va yoye mua cili. Omo tua tantekeya ngecize “Njambi ka hangula,” tu vose etu Vakaleho va Yehova tu vamuanetu hano ha mavu. Ka tua lihakele mu pulitika ni mu ku tepesa miyati. Vutuhu tua pua vantu nkala, tua liseza na vantu vose.​—Vilinga 4:13; 10:34, 35.

• Haka va lifuila Vakaleho va Yehova na vantu vose?

• Vika va lilongesa Vakaleho va Yehova mu Mbimbiliya?