Vantu va vengi ve ku singanieka nguavo vulombelo vua Vakaleho va Yehova vua pua vua vuha. Houe, mukonda mua hiti miaka ya ku tuvakana 2.700 ku fuma ha lukila Yehova vangamba veni, ngueni “Vakaleho” veni. (Isaya 43:​10-​12) Ku miaka ya ku nima, va tu tantekeyele ku pua Vakua ku Lilongesa Mbimbiliya noho mu muaka ua 1931. Vika tua hanguilile lizina lia Vakaleho va Yehova?

Lia solola Njambi yetu. Mu visoneka via laza lizina lia Njambi, Yehova, va li soneka lua luingi (makulukazi a vintsimbu) mu Mbimbiliya. Vunoni mu viMbimbiliya via vingi lizina eli va litundisamo kaha va mu lundumuna nguavo: Sukulu ni Njambi. Njambi ua vusunga ua soluele lizina lieni Yehova kuli Mosesa, ngueni: “Eli likelio lizina liange lia ku miaka yose.” (Ezundu 3:​15) Mu ku handeka ngecize, ua li tepesele ku va Njambi vose va makuli. Ca pua ku vezika ca kama kuli etu ku tsimanesa lizina lia Njambi ua ku lela.

Lia lombolola vipanga vietu. Ku putukila hali Avele muntu ua vuviuke, vantu vavengi va muesele vukaleho vua lutsilielo luavo muli Yehova. Noa, Avilahama, Sala, Mosesa, Ndaviti na vakuavo navo va lipandakanene muli lino “liselua lia Vakeleho.” (VaHevelu 11:4–12:⁠1) Ngeci mua mukaleho uze ue ku sompela muntu kesi na mulonga mu ndzango, netu tua lihakela kapandi ka ku ambulula vukaleho vua vusunga hali Njambi yetu ku vantu vose.

Tuli na ku tambuluisa Yesu. Mu Mbimbiliya Yesu va mu tumbula ku pua “Mukaleho ua cili ua vusunga.” (Ku-Solola 3:​14) Yesu ua handekele ngueni ‘ua soluele lizina lia Njambi’ na ku tualelelaho ku ‘ambulula vukaleho vua vusunga’ vua Njambi. (Yoano 17:6; 18:​37) Vose vakua ku kava Kilistu va vusunga va na pande ku ambulula na ku tantekeyesa lizina lia Njambi ku vakuavo. Kano kakeko kapandi ka va kala nako Vakaleho va Yehova.

• Omo lia vika, vakua ku lilongesa Mbimbiliya va li lukile lizina lia Vakaleho va Yehova?

• Miaka ingahi Yehova a li na Vakaleho veni hano ha mavu?

• Iya Mukaleho ua kama ua Yehova?