Ngue mu va i sana nguavo Ndzivo ya Vuangana, viose vi ve ku longesako via tala lika ha Vuangana vua Njambi​—⁠cikeco naua ca puile cimpande ca kele na ku ambulula Yesu.​—Luka 8:1.

Via pua vihela via ku lemesa ca vusunga mu membo. Ku vihela viaco evi kukekuo Vakaleho va Yehova ve ku liviukisila kuya mu ku ambulula muzimbu ua cili ua Vuangana. (Mateo 24:​14) Vindzivo vietu via Vuangana via pua via ku liseza-seza viose va vi tunga mua cili. Mu miaka ino tu na hasa ku tunga makulukazi a Vindzivo via Vuangana ha litangua vitanu (5), linga vi kungulukilo vietu vi ye ku lutue. Vati tue ku vi puisamo?​—Mateo 19:26.

Ve ku vi tunga na milambu ye ku fuma mu Vikungulukilo. Mu vikungulukilo viose mua kala tu vikasa tu va soneka nguavo ku Tunga ca Vindzivo via Vuangana mu Mavu ose. Vuana vuaco ve ku vu tuma ku seketa ya Mbetele linga vu ka kuase ku vikungulukilo vize vi tonda ku tunga ni ku tungulula Vindzivo viavo via Vuangana.

Vantu va ku liseza-seza ve ku vi tunga kaha ka ve ku va fueta vunoni va lihana vuana. Ku vihela via vingi, ve ku tumako vivunga via Vakua ku Tunga Vindzivo via Vuangana. Vivunga via vakua ku tunga na vaze va lihana ku kuasa ve ku hita mu vikungulukilo viose via mu cifuti, mu ku tuamenena na ku longesa vandolome ku tunga Ndzivo ya Vuangana. Ku vifuti vikuavo, va hanguilako Vakaleho va vutongue linga vi endese cipanga ca ku tunga na ku tungulula Vindzivo via Vuangana. Vakuluntu vaze va tantekeya mua cili ku tunga ve ku tuamenena vikungulukilo ha ku putuka kua cipanga, na vamo ka va puile Vakaleho va Yehova navo ve ku hana vukuasi. Ha ku tunga cose vantu va mu cikungulukilo ve ku lihana na mutima uose mu ku fuitangana. Sipilitu ya Yehova na ku fuitangana ca vantu vaze va lihana na mutima uavo uose ve ku puisamo eci cipanga.​—Visamo 127:1; Kolose 3:23.

• Vika tua sanena vihela vi tue ku lemesela nguetu Vindzivo via Vuangana?

• Vati tue ku hasa ku tunga Vindzivo via Vuangana mu vifuti viose?