Vakua Kilistu va ku livanga mu va kele na ku likungulula va kele na ku imba, ku vundila na ku lilongesa Mbimbiliya​—⁠ka kua kele vilika vize ka via likuatele na Mbimbiliya. (1 Kolintu 14:​26) Vakaleho va Yehova navo ve ku suama lungano luaco.

Vilongesa vietu viose via fuma mu Mbimbiliya. Ku ku-hua ca simano, ku vikungulukilo kue ku kala Cimpande ca mu Mbimbiliya ca 30 minutu, ve ku tu longesa ku mona vati visoneka via litombola na ku yoya cetu ca ntsimbu ino. Ve ku tavesa muntu uose ku litandela mu Mbimbiliya yeni. Mu nima yevi tue ku kala na cilongesa ca “Vutala vua Kaniungi” ca ola imo, mu cilongesa eci, muntu uose a li mu mbunga citava a kumbulule via na lilongesamo. Vilongesa evi vie ku tu kuasa ku yoya muaya masiko a Njambi mu miono yetu. Tue ku lilongesa cimpande cimo mu mavu ose mu vikungulukilo via ku tuvakana 110.000.

Tue ku lilongesa ku pua valongesi va vutongue. Mu kati ka simano tue ku likungulula ku ciuano ca mitamba itatu ci va luka nguavo Muono Uetu Vakua Kilistu na Vipanga Vietu, vi tue ku simutuilako via kala mu Muono Uetu Vakua Kilistu na Vipanga Vietu​—Mukanda ua Viuano. Mutamba ua katete ua Vupite vua mu Lizi lia Njambi, ue ku tu kuasa ku tantekeya vuino tumo tupitulu tu ve ku livanga ku tanda mbunga ku vindzivo. Kaha mutamba ua mu civali, Tualenu ku Lutue Cipanga Cenu ca ku Ambulula, ua kala na vimueso via muesa vati mua ku lilongesela Mbimbiliya na vantu. Umo muanetu mukua ku mamuna ue ku muesa haka tua pande ku pangela mu ku tuala ku lutue vutongue vuetu vua ku tanda na ku handeka. (1 Timoteo 4:​13) Mutamba ua ku manusuila ua pua Ku Yoya Cetu Vakua Kilistu, ue ku muesa vati tu hasa ku pangesa vitume via mu Mbimbiliya mu muono uetu ua tangua na tangua. Mue ku kala naua mutamba ua vihula na vikumbululo ue ku tu kuasa ku ivuisisa vilongesa via lova via mu Mbimbiliya.

Tangua u ka kunguluka netu, tu li na vusunga nguetu u ka komoka omo lia vize vi u ka lilongesako.​—Isaya 54:13.

• Vika u hasa ku ka mona ku vikungulukilo via Vakaleho va Yehova?

• Vilongesa vika via mu simano u tonda ku ka limuena ntsimbu izako?