1, 2. Vika tu hasa ku linga tu tualeleho ku kala mu cilemo ca Njambi?

TU VOSE tua tonda ku pua va ku kaniama ku muvila na ku kala na cihindu ca cili. Ngeci tua tonda ku-lia via cili, ku lihondolola muvila ku sua kumo na ku niunga muvila. Ku lingamo ca tondeka ku lihakela kapandi ka kama, vunoni ka tue ku likela muomu mue ku iza via cili. Vunoni tu talenu njila yeka i tua pande ku pua va ku kaniama na cihindu ca cili.

² Ku tantekeya Yehova ngue mu tu na lingi ca pua vuputukilo vua cili. Vunoni tua pande ku tualelelaho ku kaniamesa vusamba vuetu neni. Omo Yunda ua kaniamesele Vakua Kilistu ngueni: “Kalenu mu cilemo ca Njambi,” ua lomboluele vati va hasa ku lingamo. Ngueni: “Likolesienu na ku tsiliela cenu ca ku lela.” (Yunda 20, 21) Vati honi tu hasa ku kala na lutsilielo lua ku kaniama?

3-5. (a) Satana ua tonda ku mi vuisa vati ku tuala ha vitume via Yehova? (b) Vati mue ku ivua ku tuala ha masiko na vitume via Yehova?

³ Ca pua ca seho mu kale na vusunga vua ku sula ngandza ngecize vie ku tu leka Yehova vie ku tu kuasa ku hiana vikuavo viose. Satana a tonda mu singanieke nguenu vitume via Njambi via vikalu kaha mu ka kala na ndzolela nga mu lihanguila enu vavene via cili na via vipi. Ue ku  suangeleya vantu ku tava visinganieka viaco tunde mu citungu ca Endene. (Njenisisi 3:1-6) Kaha na lelo lino kasi ue ku linga cose mu ku puisamo vutumbe vueni.

⁴ Vuno cili vene masiko a Yehova a kaluua cikuma ngue mua handekele Satana ni? Na limo litangua liahi. Aci singaniekenu nga muli na ku endangana mu citungu ca vintemo via cili, kaha mu mona ngecize ha kati va na kangalaho na vikungu via laha vi mi vindika ku ka tala vintemo vili sinia lize. Kaha mu lihula nguenu: ‘Vika naua va na sitilaho aha?’ Vunoni ha ntsimbu oyo vene ndumba ohiela ku sinia lize. Vuno mu ka lihula naua nguenu vika va na sitilaho? Houe vunoni mu ka santsela muntu ua sitaho, nguenu ‘Kali-kali lelo nga nji na liua ku ndumba!’ Vitume via Yehova via pua ngue citali ca ku kangala kaha Satana ua pua ngue ndumba. Ngeci lizi lia Njambi lia tu mamuna ngualio: “Vingilenu: citozi cenu, Satana, ngue ndumba ua ku ohia, a li na ku endangana, a lengeya [ni a tonda] ou ya lia.”—1 Petulu 5:8.

⁵ Yehova ua tonda tu kale na ndzolela mu muono. Ka tondo Satana a tu sevuise. Ngeci ua tu hana masiko na vitume linga vi tu niunge na ku tu vuisa ndzolela. (Efeso 6:11) Tiango ua sonekele ngueni: “Ou a tala-tala mu lizi lia lisiko lia ku tantuluka, likelio lize lia ku linga cizango, kaha a ci kala-kalamo . . . a ka vezika mu [viuma vie] ku linga.”—Tiango 1:25.

6. Vati tu hasa ku tava ngecize vitume via Yehova via hiana seho?

⁶ Nga tu kava ku tuamenena ca Yehova, muono uetu u kenda vuino kaha vusamba vuetu neni vu ka kaniama. Ca ku muenako, tue ku uana vukuasi vua kama nga tu tava cilanio ceni ca ku vundila kuli ikeye. (Mateo 6:5-8; 1 Tesalonika 5:17) Tue ku ivua ndzolela nga tu ononoka cimamuna ca ku kunguluka ntsimbu yose na ku likaniamesa umo na mukuavo na ku linga cipanga ca  ku ambulula na ku longesa vusunga. (Mateo 28:19, 20; Ngalata 6:2; VaHevelu 10:24, 25) Mu tue ku singanieka vati ku linga evi ca tu kuasa ku kala na lutsilielo lua ku kaniama, tue ku tava mu vutuntu nguetu nkuma vitume via Yehova via hiana seho.

7, 8. Vika vi ka tu kuasa linga kati tu lisosomue na vieseko vi keza ku lutue?

⁷ Vintsimbu vimo tu hasa ku lisosomua ngecize halumo tu ka hita mu vieseko via vikalu cikuma. Nga mue ku livua ngoco vulukenu aa mezi a Yehova: “Ange nji Yehova Njambi yove, Uze a ku longesa vize vi silivila, Uze a ku tuamena mu njila ize ya ku pande. A nga ua tavele ku halakana masiko ange! Nga ciyulo cove ca puile ngue ndonga, Na vuviuke vuove ngue mancimpa a kalunga.”—Isaya 48:17, 18.

⁸ Nga tu ononoka Yehova, ciyulo cetu ci ka pua ngue  ndonga ize ka ye ku uma, na vuviuke vuetu ngue mancimba a mu kalunga aze ka eku likela. Cipue tu hite mu visoti via ku linga na ha meso vui, kasi tu hasa ku pua vakua lukakatela. Mbimbiliya ya tu kulahesa nguayo: “Mbila citeli cove hali Yehova, kaha ikeye a ka ku kolesa: ka li ka tava mukua vuviuke [kuua].”—Visamo 55:22.

9, 10. Ku pua muntu ua ku hia ca lomboloka vika?

⁹ Omo mu tualelelaho ku kaniamesa vusamba vuenu na Yehova, mu ka ‘suena ku ku tantuluka’ ni nguetu mu ka hia mu lutsilielo. (VaHevelu 6:1) Vika ca lomboloka ku hia mu lutsilielo?

¹⁰ Ku kola ngoco ku muvila ka ce ku hisa muntu mu lutsilielo. Vunoni linga tu hie mu lutsilielo, kavusamba ketu ua kama na pande ku pua Yehova, kaha tua pande naua ku lihakela kapandi ka ku mona viuma ngue mue ku vi mona ikeye. (Yoano 4:23) Paulu ua sonekele ngueni ‘vaze va yoya ku liya na viuma via ku ntsitu, ve ku tuala mana avo ku viuma via ntsitu, vunoni vaze va yoya ku liya na viuma via sipilitu, ku viuma via sipilitu.’ (Loma 8:5) Muntu ua ku hia ke ku talekesa muono ueni ku via senga ni ku vupite houe. Vunoni ue ku tuala mana ku ku pangela Yehova kaha ue ku linga vihangula via cili mu muono. (Visimo 27:11; Tandenu Tiango 1:2, 3.) Ke ku tava ku mu sindiya ku linga via ku pihia. Vunoni a tantekeya via cili kaha ue ku lihakela kapandi ka ku vi linga.

11, 12. (a) Vika ua handekele Paulu ku tuala ha ‘mavuilo a ku zangama’ a Mukua Kilistu?(b) Vati ku pua Mukua Kilistu ua ku hia ca lifua na ku pua mukua vueho?

¹¹ Ku pua muntu ua ku hia, ca tondeka ku lihakela kapandi ka kama. Kapostolo Paulu ua sonekele ngueni:  “Via-ku-lia via ku kola via pande vaze va na kolo, vaze vene omo va na pange-pange nao va li na mavuilo avo a ku zangama, va hasa ku hangununa via cili ku via vipi.” (VaHevelu 5:14) Lizi “ku zangama” li va na pangesa aha, lia lomboloka ku longesa, kaha lie tu vuluisa ku longesa ce ku tambula mukua vueho.

¹² Mu tue ku mona mukua vueho ua vutongue, tu tantekeya ngecize ua lihakela kapandi ka kama ka ku lilongesa linga apue mukua vutongue. Muomu na umo ue ku semuka na vutongue uahi. Mue ku semuka kakeke, ke ku tantekeya mua ku pangesela mavoko na mikono yeni. Vunoni mu nima ya ntsimbu ue ku lilongesa ku kuata viuma na ku enda. Kaha omo a kola nga a lilongesa via vueho a hasa ku kala na vutongue ku vueho vuaco. Na vuno vene, ce ku tondeka ntsimbu na ku lilongesa linga tu pue Mukua Kilistu ua ku hia mu lutsilielo.

13. Vika vi hasa ku tu kuasa ku lilongesa ku singanieka ngue mue ku singanieka Yehova?

¹³ Mu livulu lino, tua lilongesa vati tu ahsa ku singanieka ngue mue ku singanieka Yehova na ku mona viuma ngue mue ku vi mona ikeye. Tua lilongesa ku lema vitume via Yehova. kaha mu tue ku heta ha ku linga vihangula, tue ku lihula nguetu: ‘Masiko ni vitume vika via mu Mbimbiliya via likuata neci cimpande? Vati nji hasa ku vi kava? Yehova a tonda nji hanguleho vika?’—Tandenu Visimo 3:5, 6; Tiango 1:5.

14. Vika tua pande ku linga nga tu tonda ku kaniamesa lutsilielo luetu?

¹⁴ Ka tua pandele ku likela ku kaniamesa lutsilielo luetu muli Yehova. Via-ku-lia via cili vie ku kaniamesa muvila, ku lilongesa via Yehova ce ku kaniamesa lutslielo luetu. Mu tua putukile ku lilongesa Mbimbiliya tua lilongesele vusunga vua ku putukila ku tuala hali Yehova na vinjila vieni. Vunoni mu ku hita ca ntsimbu, tua pande ku ivuisisa  vilongesa via ku lova. Vikevio via handekelele Paulu ngueni: “Via-ku-lia via ku kola via pande vaze va na kolo.” Tue ku pua vakua mangana mu ku pangesa viuma vi tue ku lilongesa. Mbimbiliya nguayo: “Mangana akeo cuma cize ca hiana.”—Visimo 4:5-7; 1 Petulu 2:2.

15. Seho ika ya kala ha ku lema Yehova na vamuanetu?

¹⁵ Muntu a hasa ku pua ua ku kaniama kaha ua cihindu ca cili, vunoni linga a tualeleleho ku fua ngoco, na pande ku tualelelaho ku niunga vuino muvila na cihindu ceni. Na vuno vene, Mukua Kilistu ua ku hia a tantekeya ngecize na pande ku fuitangana linga a tualeleleho ku kaniamesa vusamba vueni na Yehova. Paulu ua tu vuluisa ngueni: “Liesekienu enu vavene nga mu na pu vakua ku tsiliela cili; lisetekienu enu vavene.” (2 Kolintu 13:5) Vunoni kua tondeka via vingi kati lika lutsilielo lua ku kaniama. Cilemo cetu kuli Yehova na kuli vamuanetu ca pande ku tualelelaho ku kola. Paulu ngueni: “Nga nji li na ku-tsiliela cose ngecize nji hasa ku sosolola [ni ku nungulula] mincinda, vunoni cilemo nga ka njesi naco, nji cinanta ca ngoco.”—1 Kolintu 13:1-3.

16. Satana ua tonda tu livue vati?

¹⁶ Satana a tonda tu singanieke ngecize ambe tu lihakele kapandi ka ku fua vati ka tu hasa kuya Yehova ku mutima. A tonda tu ivue vusiua na ku singanieka ngecize visoti vietu na umo uahi a hasa ku vi manusula. Ka tondo tu tsiliele vamuanetu ni tu yoye mu ndzolela. (Efeso 2:2) Satana a tantekeya ngecize ku singanieka ntsimbu yose nguetu viuma ka viende vuino ci hasa ku tu yandesa na ku pihisa vusamba vuetu na Njambi. Vunoni Yehova ua tu hana vimo vi tu kuasa ku luisa visinganieka viaco. Ua tu hana lulavelelo.

17. Lulavelelo lua kala na seho ika?

 ¹⁷ Ku mukanda ua 1 Tesalonika 5:8, Mbimbiliya ya setekesa lulavelelo ni lutalelelo luetu ku sapeu ni nguetu cikoko ce ku zala lisualale mu ku niunga mutue ueni mu ndzita, nguayo sapeu yaco “ikeyo ku-lavelela ca vuovoke.” Ku lavelela viuma via tu sika Yehova ci hasa ku niunga visinganieka vietu na ku tu kuasa ku viana visinganieka via ku henga.

18, 19. Vati lulavelelo lua kaniamesele Yesu?

¹⁸ Lulavelelo lua Yesu lua mu kaniamesele. Ku vutsiki vua ku manusuila vua kele ha mavu, ua hitile mu visoti via vikalu kaha naua via ku likava. Umo kavusamba ua kama ua mu endele vungungu. Mukuavo ua mu vianene ngueni ka mu tantekeya. Vakuavo va mu sevunukile na ku tina. Vakua cifuti ceni va mu alulukilile, na ku kakateya muangana a mu sukike. Vika via mu kuasele ku kolesa mu visoti viose evi? “Omo ndzolela ize i va mu hakelele  ua yandelele ha [citi ca kayando], ua yenguile ntsoni, kaha na tumama ku livoko lia cilio lia citumamo ca Njambi ca vuangana.”—VaHevelu 12:2.

¹⁹ Yesu ua tantekeyele ngueni nga a muesa lukakatela, a ka hana vumpahu kuli Ise na ku muesa ngecize Satana mukua makuli. Lulavelelo luaco lua mu vuisile ndzolela. Ua tantekeyele naua ngecize vuovuno a ka liuana naua na Ise muilu. Lulavelelo luaco lua mu kuasele ku kolesa. Ngeci mua Yesu, tua pande ku tuala mana ku lulavelelo luetu. Muomu lu ka tu kuasa ku kolesa mu nkala visoti vi tu ka lihita navio.

20. Vika vi hasa ku mi kuasa ku kala na visinganieka via ku sungama?

²⁰ Yehova ue ku mona lutsilielo na ku kolesa cenu. (Isaya 30:18; tandenu Malakiya 3:10.) Ua kulahesa ku puisamo ‘vizango via mutima uove.’ (Visamo 37:4) Ngecimukemuo tualenu mana ku lulavelelo luenu. Satana a tonda mu zimbalese lulavelelo luenu na ku livua  ngecize vikulaheso via Yehova ka vi ka lipuisamo. Kati mu tave ku uila mu visinganieka viaco via ku henga! Nga mu mona ngecize lulavelelo luenu luli na ku tepuluka, vundilenu vukuasi kuli Yehova. Vulukenu mezi a ku Filipu 4:6, 7: “Na vimo viahi mu umina mitima; vunoni mu viose mu ku vundila na ku lambelela hamo na ku santsela, tumbulenu vizango vienu kuli Njambi. Kaha ciyulo ca Njambi cize ca hiana mana ose, ci ka niunga mitima yenu na visinganieka vienu muli Kilistu Yesu.”

21, 22. (a) Yehova ua tonda ano mavu a fue vati? (b) Kapandi kaka mu tonda ku lihakela?

²¹ Puenu na ku sezako imo ntsimbu ya ku singanieka ha viuma via cili vi tua lavelela ku lutue. Vuovuno vose va li na muono va ka lemesa Yehova. (Ku-Solola 7:9, 14) Aci singaniekenu ha muono ua mu mavu a aha. Mu ka kala ndzolela ya kama cikuma ku hiana na muze mu tue ku singanieka! Satana, vandemone veni na viuma via ku pihia viose va ka vi tundisako. Ka mu ka vavala cipue ku-tsa. Vunoni nkala litangua mu ka hinduka na ndzili kaha na ndzolela ya kama. Tu vose tu ka pangela hamo mu ku puisa mavu citungu. Muntu ku muntu uose a ka kala na via-ku-lia via cili na cihela ca cili ca ku kala. Vantu ka va ka pua vikenia ni vakua luozi houe, vunoni va ka limuesa ngozi ya vusunga kuli umo na mukuavo. Mu ku hita ca ntsimbu, vantu vose va ka kala na “vumpahu vua vana va Njambi.”—Loma 8:21.

²² Yehova a tonda mu mu puise Kavusamba kenu ua kama. Ngeci mukemuo lingenu cose mu ononoke Yehova na ku tualelelaho ku suena ku hiehi neni nkala litangua. Mua vusunga, tu vose tu tualelenuho ku linga viuma vize vi lingisa Njambi a tualeleleho ku tu lema ku miaka yose!—Yunda 21.