Aci singaniekenu, Yehova—Mulongisi ua hiana vose na tu lania ngueni: “Ca mi pande ku pua valongisi.” (VaHe. 5:12) A tonda yetu tu longeseko vieni ku vakuetu! Nkala vukovelelo vua ku longesa vakuetu via Yehova—cipue mu vusoko, mu cikungulukilo, ni mu ku ambulula—ca pua ku vezika ca kama na citeli ca ku lema. Vati tu hasa ku vi puisamo?

Cikumbululo tu ci uana ku mezi a sonekelele kapostolo Paulu kuli Timoteo ngueni: “Zangama na ku tanda, na ku mamuna, na ku longesa.” Kaha ua vuezeleko naua ngueni: “Mu ku linga ngecize u ka liohiela ove ivene na vaze va ku halakana.” (1 Tim. 4:13, 16) Muli na muzimbu ua kuovola miono u mua pande ku zimbula. Ngeci mua pande ku vueza ku vutongue vuenu vua ku tanda na ku longesa. Vukevuo vutumbe vua uno mukanda. Aci talenu vi limo:

Yehova Ikeye ‘Mulongisi ua Kama.’ (Isa. 30:20) Mua vusunga ou mukanda u ka mi kuasa ku vueza ku vutongue vuenu vua ku tanda na ku longesa, vunoni kati mu suve ngecize Yehova ikeye Ndundzi ya muzimbu kaha ikeye ue ku koka vantu. (Yoano 6:44) Ngeci mukemuo puenu na ku vundila sipilitu santu. Pangesenu Lizi lia Njambi. Vantu va tuale mana kuli Yehova kati kuli yenu. Kuasenu vakua ku mi halakana va leme Yehova na mutima uose.

Va mi lania ku longesa muzimbu ua hiana seho ku vantu vose. Tuli na vusunga ngecize nga mu tsiliela ‘ku ngolo ye ku mi hia Njambi.’ Mu ka puisamo eci cipanga.—1 Pet. 4:11.

Vakuenu valongisi,

Civunga ca Vantuamena ca Vakaleho va Yehova