Kuli vamuanetu na vandumbuetu:

Ku lema Njambi na vantu ce ku tu sindiya linga tu ka ‘puise vantu vose vandongesi na ku va mbatiza.’ (Mat. 28:19, 20; Mako 12:28-31) Cilemo ca ku lihana ca kala na ngolo. Ce ku kuata ku mitima ya vantu vaze ‘vali na cizango ca ku ka tambula muono ka ue ku hua ua ya ye’.—Vilinga 13:48.

Laza tua kele na ku lihakela kapandi ka ku patekeya vimueso via mu kuambulula linga tu tantekeye vati tu ka seza mikanda. Vunoni tua tondeka ku vueza ku vutongue vuetu vua ku simutuila na vantu. Tu tonda ku muesa cilemo ku vantu mu ku simutuila navo ha viuma vize via vaya ku mutima. Eci ca lomboloka ngecize tua tondeka ku pua va ku votsika omo tu simutuila na nkala muntu mu ku hilula ha viuma via na lisosomua navio. Vati ou mukanda u ka hasa ku tu kuasa?

Uno mukanda uli na vilongesa 12 via lombolola vifua vi tua tondeka ku pangelaho linga tu muese cilemo omo tu puisa vantu vandongesi. Nkala cilongesa ca tsindika ha umo muzimbu ua mu Mbimbiliya ua handeka via Yesu ni umo mukua kuambulula ua ku sekulu ya ku livanga. Vutumbe vuetu kati ku patekeya vimueso via mu kuambulula. Vunoni ku tonda vinjila via ku mueselamo cilemo ku vantu. Vutuhu vifua viose via tondeka mu cipanga ca ku ambulula vunoni tu hilula ha seho ya ku muesa cikuma-kuma vimo vifua. Mu ku putuka ku simutuila, ku linga mangendzi a ku hilukila na mu kuendesa vilongesa via Mbimbiliya.

Omo mu hilula ha nkala cilongesa singaniekenu ha vati mu hasa ku muesa vifua viaco nga mu simutuila na vantu muimbo lienu. Lihakelenu kapandi ka ku sambeya cilemo cenu kuli Yehova na vantu. Cilemo caco cikeco ca seho ku hiana nkala vutongue linga mu hase ku heta ku mitima ya vantu na ku va puisa vandongesi.

Tue ku santsela cikuma ku kapandi ka mue ku lihakela ka ku pangela hamo lika netu na mutima umo lika (Zef. 3:9) Tua mi sunguiya vivezikiso via Yehova omo mu tualelaho ku lema vantu na ku va puisamo vandongesi.