Tu ci singanieke ngue tuli mu mbonge ya Yeliko. Mbonge yaco ya kala mu cifuti ca Kanana, vantu va kalamo ka va tsilielele Yehova. Mua kala naua umo mpuevo ua lizina lia Lahave.

Lahave tele a cili muana mpuevo, ua vuile mizimbu ya vati Mosesa uomisile Cisali ca ku Tila na ku patula vaIsaleli mu Ingito. Ua vuile vati Yehova ua va kuasele ku vula zindzita zi va luile na vitozi vavo. Vuovuno, nevu ngecize vaIsaleli va na tulila ku hiehi na Yeliko.

Tangua limo ku cinguendzi, vaIsaleli vavali vezile mu ku nenga mbonge ya Yeliko. Kaha va ya ku ndzivo ya Lahave. Ngeci na va tambula na ku va kovelesa mu ndzivo. Ku vutsiki, muangana ua Yeliko na tambula muzimbu ngecize mu mbonge mu na kovela vandondzi kaha va nai ku ndzivo ya Lahave. Kaha muangana na tumu vantu va ka va hiange. Lahave na va sueka helu lia ndzivo yeni kaha na leka vamala va na tumu muangana ngueni: ‘Vandondzi ku va na kala kuno, vunoni va na tuhuka laza muno mu mbonge. Nga mu va ka va vuasi-vuasi mu ka va kuata!’ Ua tantekeya vika Lahave na suekela vandondzi ni?— Muomu ua tsiliela Yehova kaha a tantekeya ngecize Yehova a ka hana cifuti ca Kanana kuli vaIsaleli.

Ntsimbu kanda vandondzi va fume ku ndzivo ya Lahave, va mu kulahesele ngecize ikeye na va vusoko vueni va kovoka ku ku-nonga ca Yeliko. Ua tantekeya vika va mu sikile ku linga ni?— Va mu lekele nguavo: ‘Kuta ou mukole ua ku tila ha njanena yove. Nga u lingamo, vose va ka kala mu ndzivo yove va kovoka’. Lahave ua lingile mpundu ngue mu va mu sikile vandondzi. Ua tantekeya vika via solokele mu nima yevi ni?—

Mu nima ya matangua a andende, vaIsaleli va zingukile mbonge va kulu. Mu ma tangua atanu na limo va zingulukile mbonge, ha litangua lumo. Vunoni lia mu citanu na avali, va zingulukileko lutanu na luvali. Kaha vose va tambekele. Kaha Yehova ua lingisile vivumbe via mbonge ku lilundumukila vivene. Vunoni ize ndzivo ya kele na mukole ua ku tila ka ya lundumukile! Ua i mono aha ha fikula ni?​—

Vika u hasa ku lilongesa hali Lahave?— Lahave ua tsilielele Yehova omo lia viuma viose via ku komouesa va lilongesele hali ikeye. Nove u li na ku lilongesa viuma via vingi via ku komouesa hali Yehova. Nove ua tsiliela Yehova ngue mua lingile Lahave ni?— Tuli na vusunga nguetu eyo!