Lembeka ua puile mpuevo ua lemene Yehova. Yalieni lizina lieni Isake. Neni ua lemene Yehova. Vati Lembeka ua tantekeyele Isake? Vati ua muesele ngecize ua tondele ku vuisa Yehova ndzolela? Tu ci mu tantekeye vuino.

Visemi va Isake va puile va Avilahama na Sala. Va tungile mu cifuti ca Kanana, muze mua kele vantu ka va puile vakua ku lemesa Yehova. Vunoni Avilahama ua tondele linga muaneni ambate mpuevo mukua ku lemesa Yehova. Ngeci ua tumine ngamba yeni, Eliezele a ka tondele Isake mpuevo ku cihela ku va lukile nguavo Halane, ku va tungile vamo va vusoko vua Avilahama.

Eliezele ua ile na vangamba vakuavo va Avilahama. Vua puile vungendzi vua laha. Va ambatele via-ku-lia na vuana ha tumelu likumi. Vati Eliezele ue ku tantekeyele mpuevo ya pandele ku hanguila Isake? Omo Eliezele na vangamba vakuavo va hetele ku Halane va tulile ha limo Lisima muomu Eliezele ua tantekeyele ngecize vuovuno vantu va putuka ku iza mu ku sua mema. Kaha ua vundilile kuli Yehova ngueni: ‘Nga nji vundila mema a ku nua kuli umo muana mpuevo, kaha a nji hana na ku hana naua ku tumelu vange, kaha nji ka tantekeya ngecize ikeye mpuevo i u na hangula.’

Kaha muana mpuevo Lembeka uezile ha lisima. Mbimbiliya nguayo ua puile ua ku viuka cikuma. Eliezele ua mu vundilile mema a ku nua, kaha ikeye ngueni: ‘Nji ku hana mema, na ku hana naua ku tumelu vove.’ Aci singaniekeho! Tumelu ve ku nua mema a engi, ngeci Lembeka ua tuntilile ha lisima lua luingi mu ku sua mema. Ua mono vati ali na ku fuitangana aha ha fikula ni?— Eliezele ua komokele cikuma omo ua muene vati Yehova ua kumbuluile civundilo ceni.

Eliezele ua hele Lembeka vuana vua vuingi vua cili. Kaha Lembeka ua laniene Eliezele na vangamba vakuavo va ye ku ndzivo yavo. Eliezele ua tangele muzimbu ua vungendzi vueni vua mu tumine Avilahama na vati Yehova ua kumbuluile civundilo ceni. Vavusoko vua Lembeka va tavele na ndzolela ngecize a somboke kuli Isake.

Ua singanieka nguove Lembeka ua tondele ku somboka kuli Isake ni?— Lembeka ua tantekeyele ngecize Eliezele va mu tumine kuli Yehova. Ngeci mukemuo, omo va vusoko vueni va mu hulile nga ua tondele ku ya ku Kanana a ka somboke kuli Isake, ua va kumbuluile, ngueni: ‘Eyo, nji ya.’ Kaha ua ile na Eliezele. Mu va ka hetele ku Kanana, Lembeka ua sombokele kuli Isake.

Yehova ua vezikisile Lembeka mukonda ua lingile vize via tondele ngueni avi linge. Kaha mu nima ya miaka ya yingi, Yesu ua semukilile ku cikota ceni! Nga nove u pua ngue Lembeka na ku vuisa Yehova ndzolela, kaha nove a ka ku vezikisa.