Ua mono ou muana mpuevo ali ha fikula ni?— Ua pua muana ua umo yala lizina lieni Yefeta. Mbimbiliya ka ya tumbuile lizina lieni, vunoni tua tantekeya ngecize ua zolesele mutima ua ise na ua Yehova. Tu ci mu tantekeye vuino hamo na ise Yefeta.

Yefeta ua puile yala ua cili kaha ua pangesele ntsimbu ya ingi mu ku longesa muaneni ua mpuevo via Yehova. Ua puile naua yala ua ngolo na ntuamena ua cili. Ngeci vaIsaleli va mu vundilile linga a va tuamenene mu ku ka luisa vitozi vavo.

Yefeta ua vundilile kuli Njambi linga a ka mu kuase ku vula. Ua likuminyine ngueni nga a ka vula ndzita, a ku hana kuli Yehova uose muntu ua katete a ka tuhuka ku ndzivo yeni mu ku mu sesa, omo a ka hiluka. Muntu uaco a ka kala miaka yose ya muono ueni mu ku pangela Njambi ku tavenakulu. Tavenakulu ca puile cihela ci va kele na ku lemesela Njambi ku ntsimbu ize. Kaha Yefeta ua vulile ndzita! Ua tantekeya iya ua tuhukile mu ku mu sesa, mua hilukile ku ndzivo ni?—

Eyo, uze muaneni ua mpuevo! Ua puile muaneni umo lika, kaha Yefeta ua pandele ku mu tuma. Eci ca mu kokele vusiua vua kama. Vunoni kati u suve ngecize Yefeta ua likuminyine. Kaha haze vene, muaneni ua mpuevo ua mu lekele, ngueni: ‘Tata, mua pande ku puisamo nkuminio yenu, muomu mua lisingile ku meso a Yehova.’

Muana Yefeta neni ua vuile vusiua. Muou ku tavenakulu ka pandele ku somboka ni ku sema vana. Vunoni ua tondele cikuma ku puisamo via likuminyine ise na ku zolesa mutima ua Yehova. Evi via puile via seho ya kama kuli ikeye ku hiana ku somboka ni ku sema vana. Ua sile ndzivo yavo na ku ka yoyela ku tavenakulu miaka yose ya muono ueni.

Ua singanieka nguove, via lingile via ile ise na Yehova ku mutima ni?— Eyo! Nga uononoka na ku lema Yehova, u hasa ku pua ngeci mua muana Yefeta ua mpuevo. Nove u ka zolesa mutima ua visemi viove na ua Yehova.