Tu lilongese via umo mukuendze uovuele muono ua nentu. Kapostolo Paulu ikeye nentu ya mukuendze uaco. Vutuhu ka tu tantekeya lizina lia mukuendze uaco, vunoni tua tantekeya ngecize ua lingile cuma ca muesele ngecize ua puile ua ku simpa cikuma. U tonda ku ivua vika ua lingile ni?—

Paulu ua kele mu kamenga ku Yelusalema. Va mu sokele mu kamenga muomu ua ambuluile lizi lia Yesu. Vamo vamala va vapi va zindile Paulu ngeci va tumbile vutumbe vua ku pihia. Va likuminyine nguavo: ‘Tu handekenu na kapitau ua masualale linga a tume masualale ku neha Paulu ku mpunga. Kaha tu ka vanda ku mukulo ua njila linga tu mu tsihe!’

Nkuma muihua ua Paulu ua vuile via vutumbe vuavo. Vika ua lingile? Ua ile ku kamenga mu ku lekako Paulu. Kaha ha ntsimbu ize vene, Paulu ua mu tumine ku lekako kapitau ua masualale. Mu ku mona cove, ca puile ca casi ku handeka na kapitau ni?— Houe, muomu kapitau ua puile mukua vukama. Vunoni muihua ua Paulu ua puile ua ku simpa ngeci ua handekele na kapitau.

Kapitau ua tantekeyele vati a linga. Ua hanguile masualale va heta ngue ku 500 linga va niunge Paulu! Kaha ku vutsiki vuze vene ua va tumine ku tuala Paulu ku Sesaliya. Vuno Paulu uovokele ni?— Eyo, vaze vamala va ku pihia ka va hasele ku mu takala! Vutumbe vuavo ka vua lipuisilemo.

Vika u hasa ku lilongesa ha muzimbu ou?— Nove u hasa ku simpa ngue mua simpile muiha ua Paulu. Tua pande ku simpa omo tu lekako vakuetu mezi a Yehova. U ka simpa na ku tualelelaho ku ambulula mezi a Yehova ni?— Nga u linga ngoco u hasa ku ovola muono ua muntu.