Ua mono ava vamala vali ha fikula ni?— Vakevo va Mateo, Mako, Luka, Yoano, Petulu, Tiango, Yunda na Paulu. Vose va yoyele ku ntsimbu ya Yesu, kaha va sonekele via Yesu. Tu ci va tantekeye vuino.

Ha kati kavo hali vapostolo vatatu va kele na ku ambuluila hamo na Yesu. Ua va tantekeya ni?— Mateo, Yoano na Petulu. Vapostolo Mateo na Yoano va tantekeyele mua cili Yesu, kaha muntu ku muntu ua sonekele livulu ku tuala ha muono ua Yesu. Kapostolo Yoano ua sonekele naua livulu li va luka nguavo Ku-solola na mikanda itatu i va tumbula nguavo Ua Mu Cimo ua Yoano, Ua Mu Civali ua Yoano na Ua Mu Citatu ua Yoano. Kapostolo Petulu ua sonekele mikanda ivali ya kala mu Mbimbiliya. Va i tumbula nguavo Ua Mu Cimo ua Petulu na Ua Mu Civali ua Petulu. Mu Mukanda ueni ua mu civali, Petulu ua sonekele via ntsimbu ya handekele Yehova hali Yesu, ku fumina muilu ngueni: ‘Ou ikeye muanange. Nja mu lema kaha ua nji ya ku mutima.’

Vamala vakuavo vali ha fikula navo va tu longesa via Yesu, mu mikanda i va sonekele. Umo uavo Mako. Mako kua kele mu va kuatele Yesu, kaha ua muene viose via mu solokelele. Mukuavo lizina lieni Luka. Ua puile ndotolo kaha ua tavele ku pua mukua Kilistu mu nima ya ku-tsa ca Yesu.

Vakua ku soneka Mbimbiliya vakuavo va u na mono ha fikula, va puile vantsongo va Yesu. U tantekeya mazina avo ni?— Mazina avo Tiango na Yunda. Ha katete ka va tavele ku tsiliela Yesu. Va singaniekele nguavo na zaluka. Vunoni mu nima ya ntsimbu, va tsilielele Yesu na ku pua vakua Kilistu.

Mukua ku soneka Mbimbiliya ua ku manusuila u u na mono ha fikula ikeye Paulu. Tele kanda a pue mukua Kilistu lizina lieni lia puile Saulu. Ua zindile vakua Kilistu kaha ua va yandesele cikuma. Ua tantekeya via lingisile Paulu ku pua mukua Kilistu ni?— Tangua limo, Paulu ua ile vungendzi kaha mu njila limo lizi lia handekele neni ku fuminina muilu. Lia puile lizi lia Yesu! Yesu ua hulile Paulu ngueni: ‘Vika u li na ku yandesela vaze va nji tsiliela?’ Mu nima yevi, Paulu ua alulukile na ku pua mukua Kilistu. Kaha ua sonekele mikanda 14 ya mu Mbimbiliya, ku putuka ha Loma ku tuala ha VaHevelu.

Tue ku tanda Mbimbiliya matangua ose, ni kati mukemuo?—Mu ku tanda Mbimbiliya tu hasa ku lilongesa via vingi hali Yesu. U tonda ku lilongesa vikuavo hali Yesu ni?—