Ua tantekeya Vuangana vu ka tu na tumbula ni?— Eyo, Vuangana vua Njambi, ovu Vuangana vu ka alulula mavu na ku a puisa palandaizi. U tonda ku lilongesa vikuavo ha Vuangana vuaco ni?—

Nkala vuangana vua kala na muangana. Uze ue ku sika vantu va kala mu cifuti caco. Ua tantekeya iya Muangana ua Vuangana vua Njambi ni?— Ikeye Yesu Kilistu. Ua kala muilu. Kaha vuovuno a ka pua Muangana ua vantu vose va ka kala ha mavu! Mu ku mona cove, tangua tu kevua ndzolela omo Yesu a ka pua Muangana ua mavu ose ni?—

Tu kevua ndzolela ya kama cikuma! Mu Palandaizi vantu ka va ka litingula naua ni ku lua ndzita. Vose va ka lilema umo na mukuavo. Na umo uahi a ka vavala ni ku tsa. Tupuputa va ka mona, tusindamatuitui va kevua, vaze ka ve ku enda va ka tunta na ku tumbuoka. Vantu vose va ka kala na via-ku-lia via vingi. Tusitu va ka pua vavusamba va umo na mukuavo, na ku pua vavusamba vuetu. Vatsi va ka sanguka. Cingi ca vamala na vampuevo va u na lilongesa mu mukanda uno, ngeci mua: Lembeka, Lahave, Ndaviti na Eliya navo va ka sanguka! U tonda ku ka va tantekeya mu va ka sanguka ni?—

Yehova ua ku lema kaha a tonda u kale na ndzolela. Tualelelaho ku lilongesa via Yehova na ku mu ononoka, kaha u ka yoya miaka yose mu palandaizi ya cili! Vikevio vi u tonda ni?—