Vumanusuilo
“Tambuluisenu vaze va ku suana matavasiano mu ku tsiliela na lukakatela.”—VAHEVELU 6:12.
1, 2. Omo lia vika tua pande ku kaniamesela lutsilielo luetu mu ntsimbu ino vene? Hanenu cimueso.
LUTSILIELO, lia pua lizi liemanena vifua viose via cili. Vunoni nga tu nevu lizi liaco tua pande naua ku singanieka ha lizi likuavo. Lizi lika? “Vuasi!” Muomu nga ka tuesi na lutsilielo kaha tua pande ku kala naluo hano vene. Kaha co nga tua kala naluo, tua pande ku lu niunga na ku lu suka vuasi-vuasi. Omo lia vika?
2 Aci singaniekenu nga muli mu likango lia kama kaha naua muli na mpuila ya kama. Nga mu uana mema, mu lihakela kapandi ka ku a niunga linga kati ome na mutana kaha naua, mu linga cose mu ambate mema a mu tondeka mu vungendzi vuose vu na lisupuko. Mu mavu ano, vantu vavengi ka va lemene ku pangela Yehova, ngeci mukemuo lutsilielo lua lukalu ku lu uana ngue mema a mu likango. Tua pande ku niunga lutsilielo luetu na ku lu kaniamesa linga kati lu ume. Na umo muntu a hasa ku yoya ca ku hona mema uahi. Na vuno vene, ka tu hasa ku likuata vusamba na Yehova ca ku hona lutsilielo.—Loma 1:17.
3. Vika ua tu hana Yehova mu tu kuasa ku niunga lutsilielo, kaha viuma vika vivali ka tua pandele ku suva?
3 Yehova a tantekeya ngecize tu tondeka lutsilielo kaha na tantekeya naua ngecize matangua ano, ca cikalu ku kala na lutsilielo lua ku kaniama. Mua vusunga, vikevio via tu hanena malungano a tu hasa ku tambuluisa. Ikeye ua tumine kapostolo Paulu ku soneka ngueni: “Tambuluisenu vaze va ku suana matavasiano mu ku tsiliela na lukakatela.” (VaHe. 6:12) Ngeci mukemuo, lukungulukilo lua Yehova lue ku tu kaniamesa tu lihakele kapandi ka ku tambuluisa malungano a vamala na vampuevo va lutsilielo, ngeci mua ava va tu na simutuila mu livulu lino. Vunoni vika honi tua pande ku linga mu ntsimbu ino? Tu vulukenu viuma vivali: (1) Tua pande ku tualelelaho ku kaniamesa lutsilielo luetu; (2) Tua pande ku vuluka ntsimbu yose viuma via tu kulahesa Yehova.
4. Vika ua linga Satana mu ku luisa lutsilielo, vunoni omo lia vika ka tua pandele ku lisosomua?
4 Tualelenuho ku kaniamesa lutsilielo luenu. Lutsilielo lua kala na citozi ua kama, Satana. Ou muangana ua ano mavu, na alulula mavu mu cifua ce ku kaluuisa vantu ku muesa lutsilielo. Vuno tua pande ku lisosomua nguetu omo ka tu hasa ku kala na lutsilielo ci pue ku lu kaniamesa ni? Houe. Yehova ua pua Kavusamba ua ngolo kuli vose ve ku muesa lutsilielo lua vusunga. Kaha ua tu kulahesa ngueni na vukuasi vueni, tu hasa ku lingisa Satana a tu tine! (Tia. 4:7) Tue ku mu luisa mu ku tonda ntsimbu nkala litangua ya ku kaniamesa lutsilielo luetu. Mu njila ika?
5. Vati vamala na vampuevo va va tumbula mu Mbimbiliya va muesele lutsilielo lua ku kaniama? Lombololenu.
5 Ngue mu tu na mono, vamala na vampuevo va va tumbula mu Mbimbiliya, ka va semukile na lutsilielo. Eci ca muesa ha toma ngecize lutsilielo, lue ku tunda ku sipilitu santu ya Yehova. (Ngal. 5:22, 23) Va vundilile Yehova a va kuase ku kaniamesa lutsilielo, kaha ikeye ua lingilemo vene. Netu tu lingenumo, kaha kati tu suve ngecize Yehova ue ku hana sipilitu santu kuli vaze ve ku i vundila na ku yoya muaya vivundilo viavo. (Luka 11:13) Kuli vikuavo naua vi tu hasa ku linga?
6. Vati tu hasa ku lilongesa via vingi mu ku tanda mizimbu ya mu Mbimbiliya?
6 Mu livulu lino, tu na simutuila ha malungano a andende ha vantu va muesele lutsilielo. Vunoni kua kala vakuavo vavengi. (Tandenu VaHevelu 11:32.) Kaha tu hasa naua, ku lilongesa via vingi ku vantu vaco. Nga tu pua na ku lilongesa mizimbu yaco mu vuasi-vuasi, ka tu ka hasa ku kaniamesa lutsilielo luetu. Linga tu hase ku lilongesa via vingi mu ku tanda cetu, tua pande ku tondesesa vuino ha cimpande. Ngeci mua ntsimbu i via solokele viuma viaco na vika via solokelele. Nga ntsimbu yose, tu pua na ku vuluka ngecize vamala na vampuevo vaco navo ka va tantulukile kaha va kele na “vifua ngue vietu,” malungano avo aka tu kuasa mua kama. (Tia. 5:17) Nga tu seteka ku lihaka mu cihela cavo, tu ka hasa ku singanieka vati va livuile mu va pindile na visoti via ku lifua na vietu.
7-9. (a) Vati ve ku livuile vamala na vampuevo va va tumbula mu Mbimbiliya, nga va kele na vukovelelo vua ku pangela Yehova ngue mu tue ku linga lelo lino? (b) Omo lia vika tua pande ku kaniamesa lutsilielo luetu ku hitila mu vilinga?
7 Tue ku kaniamesa naua lutsilielo luetu ku hitila mu vilinga. Muomu “ku-tsiliela nga ka cesi na vilinga ci na tsi.” (Tia. 2:26) Aci singaniekenu ndzolela i ve ku vuile vamala na vampuevo va tu na lilongesa mu livulu lino, nga Yehova ue ku va hanene cipanga ca tu hana yetu lelo lino!
8 Ca ku muenako, aci singaniekenu vati ue ku livuile Avihalama nga va mu lekele nguavo a pangela Yehova, kati ha mutula ua ngoco, vunoni mu Ndzivo ya Vuangana na kuya ku viuano via kama ngue mu tue ku linga lelo lino? Cikuavo naua ku vihela viaco, tue ku lilongesa viuma via ku linga ikeye ‘ua vi muenene ku laako lika.’ (Tandenu VaHevelu 11:13.) Vati ue ku livuile Eliya nga va mu lekele nguavo, cipanga ceni ka ci pu naua ku tsiha vakua ku lemesa Mbale vunoni ku ambulula muzimbu ua lulavelelo ku vantu? Tuli na vusunga nguetu, nga vamala na vampuevo va lutsilielo va va tumbula mu Mbimbiliya va kele na vukovelelo vua ku pangela Yehova ngue mu tue ku linga lelo, nga va vuile ndzolela ya kama.
9 Ngeci mukemuo, tu tualelenuho ku kaniamesa lutsilielo luetu ku hitila mu vilinga. Ku lingamo, ci ka pua ku tambuluisa vamala na vampuevo va lutsilielo va va tumbula mu Mbimbiliya. Ngue mu tu na handekele ku Vuputukilo, ku lingamo ci ka tu kuasa ku va tantekeya vene ngue vavusamba vuetu. Kaha vuovuno, vantu vaco va ka pua mpundu vavusamba venu.
10. Ndzolela ika tu ka kala nayo mu Citungu?
10 Vulukenu ntsimbu yose viuma via tu kulahesa Yehova. Ku singanieka ha vikulaheso via Njambi, ca kaniamesele vamala na vampuevo va va tumbula mu Mbimbiliya. Nenu mue ku lingamo ni? Ca ku muenako, a ci singaniekenu ha ndzolela i mu kevua mu ku sesa vakua lutsilielo omo “ku ka kala cisangukilo ca vakua vuviuke.” (Tandenu Vilinga 24:15.) Viuma vika mu ka tonda ku va hula?
11, 12. Mu mavu a aha vihula vika mu ka linga (a) Avele? (b) Noa? (c) Avilahama? (d) Lute? (e) Avingaile? (f) Estele?
11 Omo mu ka liuana na Avele, mu ka mu hula vati va fuile visemi veni ni? Ni halumo mu ka mu hula nguenu: “Vati mua hasele ku handeka na vaselumbini va kele ku vukovelelo vua Endene? Nga mua lingilemo, va mi kumbuluile?” Kaha Noa co, halumo mu ka mu hula nguenu: “Vati, mua vuile liova lia makisikisi ni? Vati mua hasele ku niunga tusitu vose vaze mu muaka u mua kele mu vuato?” Nga mu ka liuana na Avilahama halumo mu ka mu ihula nguenu: “Mua liuaneneho laza citona meso na Seme ni? Iya ua mi longesele via Yehova? Ku tunda mu Ule ca mi kaluuilile ni?”
12 Aci singaniekenu naua ha vihula vi mu ka linga vampuevo va ka sanguka: “VaLute, vika via mi lingisile ku putuka ku pangela Yehova? “VaAvingaile, mua vuile liova lia ku leka vaNavale via vukuasi vu mua hele kuli Ndaviti ni?” “VaEstele, vika via mi solokelele hamo na vaMolendekayi mu nima ya muzimbu u va soneka mu Mbimbiliya?”
13. (a) Vihula vika halumo va ka mi lingila vaze va ka sanguka? (b) Vati muli na ku livua ku tuala ha lulavelelo lua ku ka liuana citona meso na vamala na vampuevo va lutsilielo va va tumbula mu Mbimbiliya?
13 Mua vusunga, ava vamala na vampuevo navo halumo va ka mi linga vihula via vingi. Cili, mu kevua ndzolela ya kama ya ku va lomboluela via matangua a ku kotokela, na vati Yehova ua vezikisile vangamba veni mu vintsimbu via vikalu! Na vimpata viahi, navo va kevua ndzolela ya ku tantekeya vati Yehova ua puisilemo vikulaheso viose via va lingile. Ku ntsimbu yaco, ka ci ka tondeka naua ku lihakela kapandi ka ku singanieka ha malungano a vantu va lutsilielo va va tumbula mu Mbimbiliya. Muomu tu ka kala navo mu Citungu! Ngeci mukemuo, lingenu cose mu ku lilongesa via vantu vaco mu cifua ca ku linga va pue honi ngue vavusamba vuenu mu ntsimbu ino. Kaha tualelenuho ku tambuluisa lutsilielo luavo. Kaha tua vundila nguetu livuisenu ndzolela ya ku pangela Yehova hamo lika navo ku miaka yose!
