Vuputukilo
“Tambuluisenu vaze va ku suana matavasiano mu ku tsiliela na lukakatela.”—VAHEVELU 6:12.
1, 2. (a) Vati umo kaniungi ua ku zinguluka ua puisile vantu va mu Mbimbiliya? (b) Vukuasi vuka tu hasa ku uana nga vantu va va tumbula mu Mbimbiliya va pua vavusamba vetu?
UMO NDUMBUETU mu nima ya ku halakana cimpande ca umo kaniungi ua ku zinguluka, ua handekele ngueni: “Ue ku handeka via vantu va mu Mbimbiliya ngue va puile vavusamba veni.” Kaha vusunga vene, muomu kaniungi uaco ua kele miaka ya yingi mu ku lilongesa Lizi lia Njambi na ku longesako vakuavo, ngeci vantu va va tumbula mu Mbimbiliya va puile honi ngue vavusamba veni va laza.
2 Vantu va va tumbula mu Mbimbiliya, va hasa ku pua vavusamba vetu, ni vati? Vati, mua va puisa laza vavusamba venu ni? Nga ca tavele kuenda na ku simutuila na vantu ngeci mua Noa, Avilahama, Lute, Eliya na Estele, vati mu hasa ku livua ku mutima? Mua vusunga, vimamuna viavo na ku kaniamesa cavo nga via mi kuasa mua kama mu muono!—Tandenu Visimo 13:20.
3. (a) Vati ku lilongesa via vantu va lutsilielo va va tumbula mu Mbimbiliya ci hasa ku tu kuasa? (b) Vihula vika tu simutuila?
3 Mu nima ya “cisangukilo ca vakua vuviuke” citava tu ka likuate navo vusamba vuaco. (Vilinga 24:15) Vunoni ambe mu ntsimbu ino, tu hasa ku lilongesa via vingi mu ku hilula mizimbu ya mu Mbimbiliya ya vamala na vampuevo va lutsilielo. Mu njila ika? Kapostolo Paulu ua hele eci cikumbululo: “Tambuluisenu vaze va ku suana matavasiano mu ku tsiliela na lukakatela.” (VaHe. 6:12) Omo tu simutuila via vantu va lutsilielo va va tumbula mu livulu lino, tu ci hilulenu ha vihula vi hasa ku katuka ha mezi a handekele Paulu: Lutsilielo vika? Omo lia vika lua tondeka? Vati tu hasa ku tambuluisa vakua lutsilielo va va tumbula mu Mbimbiliya?
Lutsilielo lua pua Vika Kaha omo lia Vika lua Tondeka?
4. Vika ve ku singanieka vantu ku tuala ha lutsilielo kaha omo lia vika ku singanieka ngoco ca pua ku sevuka?
4 Lutsilielo lua pua cifua ca cili kaha vantu va lutsilielo va tu simutuila mu livulu lino, vose va muene ngecize cifua caco ca tondeka cikuma. Vantu vavengi lelo lino, ve ku sembulula lutsilielo nguavo, muomu lue ku lingisa muntu ku kalahela mu viuma ka viesi na vukaleho. Vunoni ve ku sevuka. Muomu ku kala na lutsilielo ka ca lombolokele ku pua kapuputa, ni nguetu ku tava ngoco viuma. Ku tava ngoco viuma ca pua vusonde. Cikuavo naua, ku tava ngecize Njambi kua kala kati cikeco lika ca tondeka, muomu “vandemone naua va tsiliela na ku zaza.”—Tia. 2:19.
5, 6. (a) Lutsilielo luetu lua hitukila ha viuma vika vivali? (b) Lutsilielo luetu lua pande ku kaniama vati? Hanenu cimueso.
5 Mbimbiliya ya lomboloka vika mpundu via pua lutsilielo. (Tandenu VaHevelu 11:1.) Paulo ua handekele ngueni lutsilielo lua hitukila ha viuma vivali ka tu hasa ku mona. Ca ku livanga, “ku tava vize vintsa kanda tu mona.” Meso etu ka a hasa ku mona viuma via ku sipilitu ngeci mua Yehova Njambi, Muaneni, ni Vuangana vueni. Ca mu civali, ku tuala mana ku “viuma via ku lavelela” ni nguetu vize kanda vi ci lingike. Ca ku muenako, ka tu hasa ku mona mavu a aha a vu ka neha Vuangana vua Njambi vuovuno. Vuno eci ca lomboloka, ku tsiliela mu viuma kanda tu mone na ku lavelela viuma kanda vi lingike, ca pua ku lisina ngoco ni?
6 Houe. Muomu Paulu ua lomboluele ngecize lutsilielo lua vusunga, lua hitukila ha luvula lua vusunga. Lizi lia pangesele ngueni “ciye” lia lomboloka citantekeyeso ni lipapelo lie ku hana vukaleho ngecize eci cuma ca ngandi. Ca ku muenako, nga muntu a tonda ku mi hana ndzivo, a hasa lika ku mi hana mapapelo ya ndzivo yaco ngueni: “Nja mi hana ndzivo eyi.” Vutuhu ngoco, eci ka ca lombolokele ngecize a tonda mu yoyele ha lipapelo. Vunoni lipapelo liaco lua pua vukaleho vua kama vua muesa ngecize ndzivo yaco yenu. Ci na pu vene ngue lipapelo liaco likelio vene ndzivo. Na vuno vene, vukaleho vua viuma vi tua tsiliela, vua pua vua kama kaha vua vusunga, mu cifua ca ku linga ngue tua mona laza viuma viaco.
7. Lutsilielo lua vusunga lua pua ngue vika kaha lua tondeka vika?
7 Ngeci mukemuo, lutsilielo lua vusunga lua pua ku kala na vukaleho kaha na lukulahelo lua kama muli Yehova Njambi. Lutsilielo lue ku tu lingisa tu mone Yehova ku pua Tatetu ua cilemo, na ku kulahela ngecize vikulaheso vieni viose tangua vi ka lipuisamo. Vunoni lutsilielo lua vusunga, lua pua ngue cuma ca muono. Lua tondeka ku lu suka na ku liniunga linga kati lu tse, lua tondeka vilinga.—Tia. 2:26.
8. Omo lia vika lutsilielo lua pua lua seho ya kama?
8 Omo lia vika lutsilielo lua pua lua seho ya kama? Cikumbululo tu ci uana mu mezi a Paulu. (Tandenu VaHevelu 11:6.) Ka ci tava ku vundila kuli Yehova ni kuya ku mutima ca ku hona lutsilielo. Lutslielo lua tondeka nga tu tonda ku puisamo vutumbe vua kama, cipue ku tungelo ni ku vantu. Vutumbe vuka? Ku likuata vusamba na Tatetu Yehova na ku mu lemesa.
9. Vati Yehova ua muesa ngecize a tantekeya ngueni tua tondeka lutsilielo?
9 Yehova a tantekeya ngecize etu vantu tua tondeka lutsilielo, ngeci ua tu hana malungano a cili mu ku tu kuasa ku ka kaniamesa cifua caco. Cikuavo naua, mu cikungulukilo mua kala vakuluntu ve ku tu tuamena kaha Lizi lia Njambi lia tu kaniamesa ngualio: “Tambuluisenu ku-tsiliela cavo.” (VaHe. 13:7) Ku vuezelela hali ava, Paulu ua sonekele naua via “liselua lia kama . . . lia vakaleho” vamala na vampuevo va ku laza va puile lungano lua cili mu lutsilielo. (VaHe. 12:1) Mu kapitulu 11 ka VaHevelu Paulu ua va tumbuile ha mazina, vunoni kuli vakuavo naua. Mu Mbimbiliya mua kala mizimbu ya yingi ya vamala na vampuevo, vanike na vakuluntu, va ku miyati yose, va muesele lutsilielo. Kaha tu hasa ku lilongesa via vingi ku lutsilielo luavo mu mavu ano a ku hona lutsilielo.
Vati tu Hasa ku Tambuluisa Lutsilielo lua Vakuetu?
10. Vika tu hasa ku linga mangana tu lilongese via vingi mu ku tambuluisa vantu va lutsilielo va mu Mbimbiliya?
10 Ka ci tava ku tambuluisa muntu ca ku hona ku talesesa vilinga vieni. Omo mu lilongesa lino livulu, mu ka mona ngecize tua lihakelele kapandi ka ku tondesesa mua kama, linga tu mi kuase ku mona ava vamala na vampuevo va lutsilielo. Tua mi kaniamesa nenu mu tondesese. Mu cilongesa cenu ca mu vulika, tondesesenu mu Mbimbiliya na vikuata via ku tondesesa via mu lilimi lienu. Omo mu hilula ha viuma vi muli na ku lilongesa, setekenu ku mona vihela na vantu va mu mizimbu ya mu Mbimbiliya i muli na ku tanda. Setekenu ku mona vi va muene, vi va vuile na mazimba a va vuile. Setekenu ku nongonona cifua ci va livuililemo ku mitima. Mua vusunga, ku lihaka mu cihela ca ava vamala na vampuevo va lutsilielo, ci ka mi kuasa ku va tantekeya vuino na ku va puisa ngue vavusamba venu va ku laza.
11, 12. (a) Vati mu hasa ku putuka ku lema Avilahama na Sala? (b) Vati lungano lua Hana, Eliya ni Samuele lu hasa ku mi kuasa?
11 Nga mu va tantekeya vuino, mu kevua cizango ca ku va tambuluisa. Aci singaniekenu nga lukungulukilo lu na mi hana cimo cipanga. Ku ka pangela kuze ku tondeka vakua ku ambulula vavengi. Ni halumo, va na mi vundila ku ambulula mu cifua ka mu tantekeya ni ce ku mi kaluuila. Omo mu singanieka ha cipanga caco, ku hilula ha lungano lua Avilahama ci hasa ku mi kuasa mua kama. Neni na Sala va tavesele ku seza muono ua cili mu Ule, vunoni va tambuile vivezikiso via vingi. Omo mu lihakela kapandi ka ku tambuluisa lungano luavo, mu ka mona ngecize muli honi na ku va tantekeya vuino.
12 Vati co nga umo kavusamba ni kavusoko a muesa vuhenge kaha mu ivua ku mbunge vui, na cizango ca ku kunguluka cahi? Ku singanieka ha lungano lua Hana na cifua ca hianenemo vuhenge vua Penina, ci hasa ku mi kuasa ku linga cihangula ca cili. Kaha Hana a ka pua ngue kavusamba kuli yenu. Nga visinganieka via ku livua vungoco vi li na ku mi vuisa vusiua, mu hasa ku lema ku lilongesa via Eliya na cifua ca mu lembeziekelelemo Yehova. Vakuendze na vahumbe va ve ku sindiya ku linga via mazilo ku sikola, va hasa ku lema ku lilongesa via Samuel uze ua kolesele vutuhu vana va Eli va kele na ku linga vupi ku tavenakulu.
13. Vuno ku tambuluisa lutsilielo lua vantu va va tumbula mu Mbimbiliya ca lomboloka ngecize ka tua kele na lutsilielo lua ku kaniama ni? Lombololenu.
13 Vuno Yehova a ka mi mona ngue ka mua kele na lutsilielo lua ku kaniama, muomu mue ku temunuina lutsilielo lua ava vantu ni? Houe. Lizi lia Yehova lia tu kaniamesa ku tambuluisa vantu va lutsilielo. (1 Kol. 4:16; 11:1; 2 Tes. 3:7, 9) Cikuavo naua, vamo vantu va tu simutuila mu livulu lino, navo va tambuluisile lutsilielo lua vakuavo va yoyele ku nima yavo. Ca ku muenako, kapitulu 17 ka muesa ngecize citava Maliya ua tambuluisile mezi a Hana. Vuno mu ku lingamo, Maliya ka kele na lutsilielo ni? Ua kele naluo! Lungano lua Hana lua kuasele Maliya ku kaniamesa lutsilielo lueni na ku panga lizina lia cili ku meso a Yehova Njambi.
14, 15. Tumbulenu vimo viuma vi va na haka um livulu lino, na vati vi hasa ku tu kuasa.
14 Lino livulu, va lipangela ku mi kuasa ku kaniamesa lutsilielo luenu. Tupitulu tulimo, tua ku tundisa mu mutamba “Tambuluisenu Lutsilielo Luavo” tua tuhukile tunde mu Vutala vua 2008 ku tuala ha 2013. Vunoni tu na vuezelelako imo mizimbu. Ca ku muenako, tu na hakamo vihula linga vi mi kuase mu ku lilongesa. Kaha tu na hakamo naua, vikupulo via cili kaha via vize via laza tu na vi hamesa na ku vi viukisa naua vuino. Cikuavo naua, tu na hakamo cipalo ca ntsimbu na vimapa. Lino livulu lia Tambuluisenu Lutsilielo Luavo va lipangela ku tu kuasa ku ku lilongesa mu vulika, mu vusoko, na mu cikungulukilo. Masoko a hasa naua ku lema ku tanda lika mizimbu yaco nga vali hamo lika.
15 Tua vundila nguetu lino livulu li mi kuase ku tambuluisa lutsilielo lua vangamba va Yehova va ku laza. Kaha li mi kuase naua ku kolesa lutsilielo na ku likata na Isuenu ua muilu, Yehova!