Vamuanetu na Vandumbuetu:

Tunde lia 1 ya Janeiro ya 2008, mu Vutala vua mbunga mua putukile ku tuhuka cimpande ca ku tovala ca mutue: “Tambuluisenu Lutsilielo Luavo.” Tunde mu Vutala vuze vua katete, cimpande caco ce ku tuhuka-tuhuka mu nima ya vingonde vitatu!

Vika ve ku handeka vantu ve ku tanda vimpande viaco? Mu nima ya ku tanda muzimbu ua Mata, umo mukua ku tanda ngueni: “Cimpande caco ca nji zolesele mua kama, muomu nange nja fua ngue Mata, ntsimbu yose nja tonda ku tambula vuino vangendzi vunoni vintsimbu, vimo nje ku suva ku tuala mana ku ku sikama navo.” Umo kankavala mu nima ya ku tanda muzimbu ua Estele, ua handekele ngueni: “Nga ka tua zangamene, tu hasa ku lisosomua cikuma na zalesi kaha na vuzalo vuli mu moda. Vutuhu tua tonda ku soloka vuino, vunoni tua pande ku zangama linga kati tu hianesemo.” Kaha ua vuezeleko ngueni: “Yehova ue ku tala ku vuntu vuetu vua mu ntima.” Umo ndumbuetu mu nima ya ku tanda muzimbu ua kapostolo Petulu ua handekele ngueni: “Mu nja tandele muzimbu uaco, nja livuile vene ngue nji li na ku mona viuma vi nji li na ku tanda. Nja livuile ngue nange njili ku cihela caco.”

Ava vakua ku tanda, na cingi ca vakuavo va tu sonekela mikanda ya ku santsela, va muesa vukaleho vua viuma via sonekele kapostolo Paulo ngueni: “Muomu viose vi va sonekele laza, va vi sonekelele ku tu longesa.” (Loma 15:4) Yehova ua muene ngecize mizimbu yaco ya seho, ngeci ua i tavesele va i soneke mu Mbimbiliya. Tu vose, ambe nga tu va laza mu vusunga, tu hasa ku lilongesa via vingi ku mizimbu yaco.

Tua mi kaniamesa mu tande lino livulu mu nima ya ku litambula vene ngeci. Ci pua ca cili nga mu lilongesalio mu ku Lemesa ca mu Vusoko. Vana venu va ka li lema. Mu tu ka lilongesa livulu liaco mu Cilongesa ca Mbimbiliya mu Cikungulukilo, kati mu ka liputuise ciuano na cimo cahi! Tandenu livulu liaco na civando. Kaha pangesenu visinganieka vienu na ku seteka ku lihaka mu nkala muzimbu u mu tanda. Setekenu ku livua mu cifua ca livuile muntu ali mu muzimbu u muli na ku tanda, na ku mona vi va muene. Singaniekenu ha viuma vi va lingile, na ku mona vati mue ku lingile nga mua kele mu cihela cavo.

Tuli na ndzolela ya kama ya ku mi hana lino livulu kaha tuli na vusunga ngecize li ka pua civezikiso kuli yenu na ku vusoko vuenu. Tua mi sunguiya viose via cili. Na cilemo,

Civunga ca Vantuamena ca Vakaleho va Yehova