NGA mu tanda nkala lipapelo lia mizimbu. Mu halakana ku cisandzi ni mu tala ha televizau. Mu kevua mizimbu ya ingi i vuisa vuoma ngeci mua zindzita na ku litsihanga! Singaniekenu ha visoti vienu. Halumo ku vavala ni ku tsa ca umo kavusoko kenu ci li na ku mi nehela lamba ya kama. Halumo mue ku ivua ngue mua vuile umo yala ua cili Yombi ua handekele ngueni, lamba yeni ya lemene “ku pulakana museke ua ku mema a kalunga.”—Yombi 6:2, 3.

Lihulenu nguenu:

• Vuno evi vikevio via tondele Njambi kuli yange na ku vantu vose ni?

• Kulihi nji uana vukuasi vua ku lua na visoti viange?

• Vuno tangua tu ka yoya mu ciyulo ha mavu ni?

Mbimbiliya ya hana vikumbululo via vusunga ku vihula evi.

“A ka hunda masozi ose ku meso avo; na ku-tsa ka ci ka kala naua; cipue ku-linienga na vusiua ka ci ka kala naua, cipue ku lila, cipue ku vavala: viuma via ku livanga vi na hiti.”—Ku-Solola 21:4

“Cilema a ka tumbuka ngue ntava.”—Isaya 35:6

“Meso a tupuputa a kemuka.”—Isaya 35:5

“Vose va li mu vihilo. . . va ka tuhukamo.”—Yoano 5:28, 29

“Mundambo ka li ka handeka ngueni: ‘Nji ku vavala.’”—Isaya 33:24

“Ku ka kala ku-lana ca mbuto ha mavu.”—Visamo 72:16

Kati mu sembulule vi va na soneka ha mafo ali ku nima, nguenu vi na pu visimo via ngoco. Njambi na likuminia kua ku vi puisamo kaha Mbimbiliya ya lombolola vati a ka vi puisamo.

Vunoni Mbimbiliya i hasa ku mi kuasa naua mu vinjila vikuavo. I mi kuasa ku yoya mua cili mu ntsimbu ino vene. Aci singaniekenu ha visoti vi muli navio. Halumo ka muesi na vimbongo, muli na vitanga ha ndzivo, ka muesi na cihindu ca cili ni mu na tsisa kavusoko. Mbimbiliya i hasa ku mi kuasa ku lua na visoti via matangua ano na ku kumbulula vihula ngeci muevi:

• Vika tue ku yandela?

• Vati tu hasa ku lua na visoti via muono?

• Vati tu hasa ku yoya mu ndzolela ha ndzivo?

• Vika vie ku soloka kuli etu nga tu tsa?

• Tangua tu ka mona vavusoko vuetu va tsa ni?

• Vati tu hasa ku kala na vusunga ngecize Njambi tangua a ka puisamo via likuminia?

 Omo mu na tava ku tanda lino livulu, mu na muesa ngecize mu tonda ku tantekeya vi ya longesa Mbimbiliya. Lino livulu li ka mi kuasa cikuma. Mu ka mona ngecize cinanga na cinanga ci li na cihula ku ntsina ya lifo. Vantu va vengi va lema ku pangesa vihula na vikumbulula mu ku simutuila Mbimbiliya na Vakaleho va Yehova. Tua tsiliela ngecize nenu mu ka vi lema. Njambi a mi vezikise omo mu lilongesa na ndzolela ya vutuntu viuma vi ya longesa mpundu Mbimbiliya!