VATI mue ku singanieka Litangua lia Vusompelo? Vavengi ve ku singanieka nguavo vantu vose, va ka vemika ku lutue lua citumamo ca Njambi ca Vuangana. Kaha muntu ku muntu va ka mu sompesa. Vamo va ka va vezikisa na muono ua cili muilu, vakuavo va ka uema vutsiki na mutana. Vunoni, Mbimbiliya ya longesa vieka ku tuala ha ntsimbu yaco. Lizi lia Njambi lia lombolola ngecize ka i ka pua ntsimbu ya vuoma, vunoni ntsimbu ya lulavelelo na ku hiluisa viuma via cili ngue mu via fuile laza.

Ku Ku-Solola 20:11, 12, kapostolo Yoano ua lomboluele via Litangua lia Vusompelo ngueni: ‘Kaha nja muene citumamo ca Vuangana ca ku vuka ca kama, na uze ua tumameneho, ku  luholo lueni mavu na lilu via tinine, na muhela uavio ka va u uanene. Kaha nja muene vatsi, ava va kama na ava va vandende, va mene ku lutue lua citumamo ca vuangana; kaha va fukuile mikanda: kaha va fukuile mukanda ueka, ukeuo ua muono: kaha va sompesele vatsi na vize vi va sonekele mu mikanda, ngue ku vilinga viavo.’ Iya Ngazi u va na tumbula aha?

Yehova Njambi ikeye Ngazi ua kama ua vantu vose. Vunoni ua hangula ngazi ueka mu ku panga cipanga caco. Ku Vilinga 17:31 kapostolo Paulu ua handekele ngueni Njambi “na hangula litangua limo omo a ka sompela mavu na vuviuke hali yala uze ya na tumbula.” Ou Ngazi ya na tumbula ikeye Yesu Kilistu uze ya sanguile. (Yoano 5:22) Litangua lia Vusompelo li ka putuka tangua lika? Kaha li kesuala ntsimbu ingahi?

Livulu lia Ku-Solola lia muesa ngecize Litangua lia Vusompelo li ka putuka mu nima ya ndzita ya Alemangendo, omo va ka va nongesa mavu a Satana. * (Ku-Solola 16:14, 16; 19:19–20:3) Mu nima ya Alemangendo, Satana na vandemone veni va ka va kuta na ku va mbila mu cina ka cesi na masima mu likulukazi lia miaka. Mu ntsimbu yaco, va 144.000 va ka pua vangazi na ku ‘sika hamo na Kilistu mu likulukazi lia miaka.’ (Ku-Solola 14:1-3; 20:1-4; Loma 8:17) Litangua lia Vusompelo ka li ka pua litangua lia viola 24 lika. Vunoni li kesuala Likulukazi lia miaka.

Mu likulukazi lia miaka, Yesu Kilistu ‘a ka sompesa vakua ku yoya na vatsi.’ (2 Timoteo 4:1) “Vakua ku yoya” va ka pua vakua “civunga ca kama” vaze va kovoka ku Alemangendo. (Ku-Solola 7:9-17) Kapostolo Yoano ua muene “vatsi . . . va mene ku lutue lua citumamo” ca vusompelo. Ngue mua kulahesele Yesu ngueni “vose va li mu vihilo va kevua lizi lieni [Kilistu], kaha va ka tuhukamo” ku hitila mu cisangukilo. (Yoano 5:28, 29; Vilinga 24:15) Vika va ka va sompesela?

 Ku liya na cimona ca kapostolo Yoano “va fukuile mikanda kaha va sompesele vatsi na vize vi va na sonekele mu mikanda, ngue ku vilinga viavo.” (Ku-Solola 20:12) Vuno omu mu mikanda va sonekamo vilinga via laza via vantu ni? Houe, muomu vantu ka va ka va sompesa ku liya na vize vi va lingile laza tele kanda va tse. Vati tua tantekeya ngoco? Mbimbiliya nguayo: “Uze na tsi na sambue ku vupi.” (Loma 6:7) Vaze va ka sanguka, ka va keza na vumo vupi vuahi. Ngeci mukemuo, mu mikanda ize mu ka kala vitume vieka via Njambi ku vantu. Linga vaze va kovoka ku Alemangendo na vaze va ka sanguka, va ka yoye miaka yose, va na pande ku ononoka masiko na vitume vikuavo via ka vuezako Yehova mu likulukazi lia miaka. Ngecize, muntu ku muntu va ka mu sompesa ku liya na vize vi a ka linga mu ntsimbu ya Litangua lia Vusompelo.

Mu miaka ya Litangua lia Vusompelo, vantu va ka va hana ntsimbu ya ku lilongesa cizango ca Njambi na ku ci ononoka. Eci ca lomboloka ngecize ku ka kala cipanga ca kama ca ku va longesa. Mua vusunga, ‘vandambo va ha mavu va ka lilongesa vuviuke.’ (Isaya 26:9) Vunoni kati vose va ka tava ku ononoka ku cizango ca Njambi. Isaya 26:10 nguayo vutuhu va ka “muesa kavumbi kuli mukua vupi, kasi ka li ka lilongesa vuviuke; mu cifuti ca vusunga a ka linga via vuhenge, ke ku mona vukama vua Yehova.” Ava vakua vupi va ka va nongesa mu miaka ya Litangua lia Vusompelo, kaha ka va ka sanguka naua.—Isaya 65:20.

Ku ku-hua ca Litangua lia Vusompelo, vaze va kovoka ‘va ka yoya’ mpundu muomu va ka pua va ku tantuluka. (Ku-Solola 20:5) Ngeci mukemuo, mu miaka ya Litangua lia Vusompelo, vantu va ka va hiluisila cifua ca ku tantuluka, ngue ku vutumbe vua Njambi. (1 Kolintu 15:24-28) Vunoni kasi ku ka kala ceseko ca ku manusuila. Muomu va kecela Satana mu kamenga keni kaha va ka mu eca linga a ka onge vantu lua ku manusuila. (Ku-Solola 20:3, 7-10) Vaze va ka mu viana, va kevua ndzolela mu vu ka lipuisamo vupolofeto vua mu Mbimbiliya, vua handeka ngecize: “Vakua vuviuke va ka  suana cifuti, kaha va ka kalamo ku miaka na miaka ya ya-ye.” (Visamo 37:29) Mua vusunga, Litangua lia Vusompelo li ka pua civezikiso ku vantu vose va ku ononoka!