VIMPANDE VIA KU VUEZAKO
Mulalelo ua Muangana—Cilika ce ku Muesa Kasingimiko Kuli Njambi
VAKUA Kilistu va va sika ku linga cilika ca ku Vuluka ku-tsa ca Kilistu. Eci cilika va ci luka nguavo: ‘Mulalelo ua Muangana.’ (1 Kolintu 11:20) Vika via lingisa eci cilika ku pua ca seho ya kama? Ntsimbu ika na vati va na pande ku ci linga?
Yesu Kilistu ua tumbikile eci cilika ku vutsiki vua Pasovala ya vaYundeya mu 33 EC. Pasovala ca puile cilika ci va kele na ku linga vaYundeya lumo mu muaka, ha litangua lia 14 lia ngonde ya vaYundeya ya Nisane. Linga va tantekeye litangua lia 14 ya Nisane, vaYundeya va kele na ku lavelela litangua li kue ku kala viola 12 ku mutana na viola 12 ku vutsiki. Mu ngonde ya ku tentama ya katete, eli litangua likelio lia puile vuputukilo vua ngonde ya Nisane. Pasovala va kele na ku i linga mu nima ya matangua 14, mu nima ya ku lahuka ca litangua.
Yesu ua lingile Pasovala na vapostolo veni, kaha mua tuhukilemo Yundasa Iskaliota, amba vuose ua tumbikile cilika ca Mulalelo ua Muangana. Eci cilika ca sintsile mu Pasovala ya vaYundeya ngeci mukemuo tua pande ku ci vuluka lumo mu muaka.
Muzimbu ua Cili ua Mateo ua ambulula nguauo: “Yesu ua nonene mbolo, ua i vezikisile, ua i pazuile; kaha ua i hele kuli vandongesi, ngueni, ‘Tambulenu, lienu, eyi muvila uange’. Kaha ua tambuile ngandza, ua i santselele, ua i hele kuli vakevo, ngueni, ‘Enu vose nuenumo; Muomu eyi “maninga ange a litavasiano” lia liha, a ku muaniena va vengi, ku vecela ku milonga yavo.’”—Mateo 26:26-28.
Vavengi va tsiliela ngecize Yesu ua himpuile mbolo ku pua mpundu ntsitu yeni na viniu ku pua maninga eni mpundu. Vunoni Yesu mua hele mbolo, ka tetele ntsitu ha muvila ueni houe! Vuno vapostolo va lile mpundu muvila ua Yesu na ku nua maninga eni ni? Houe, muomu uose ue ku lia ntsitu ya muntu na ku nua maninga a muntu ua pua ciliavantu kaha ku lia vantu va ci vindika mu Lizi lia Njambi. (Njenisisi 9:3, 4; Levitiku 17:10) Ku liya na Luka 22:20, Yesu ua handekele ngueni: “Ngandza eyi ikeyo litavasiano lia lihia mu maninga ange, aze a ku mi muaniena enu.” Vuno ize ngandza ya himpukile mpundu “litavasiano lia lihia”? Houe ka citava, muomu litavasiano lia pua nkuminio kati cuma ci tu hasa ku kuata na mavoko.
Ngeci mukemuo mbolo na viniu via pua lika vimueso. Mbolo yemanena muvila ua ku tantuluka ua Kilistu. Yesu ua pangesele civalavala ca mbolo ca lisupile ku Pasovala. Mbolo yaco va i pangele ca ku hona cimbaluila. (Ezundu 12:8) Vintsimbu via vingi, Mbimbiliya ya pangesa cimbaluila mu ku imanena vupi ni ku pola. Ngeci mbolo yemanena muvila ua ku tantuluka ua Yesu ua kombeleyele. Ka ua kele na vupi.—Mateo 16:11, 12; 1 Kolintu 5:6, 7; 1 Petulu 2:22; 1 Yoano 2:1, 2.
Viniu via ku tila viemanena maninga a Yesu. Maninga akeo a lingisa litavasiano lia lihia ku pua lia seho. Yesu ua handekele ngueni maninga eni a muaniene mu ku ‘ecela ku milonga.’ Ngeci mukemuo, vantu va hasa ku pua va ku lela ku meso a Njambi, kaha va hasa ku kovela mu litavasiano lia lihia na Yehova. (VaHevelu 9:14; 10:16, 17) Eli litavasiano ni nguetu nkuminio, lia sokolola njila linga Vakua Kilistu va ku pua 144.000 va ka ye muilu. Va ka pua vamiangana na vasasendote mu ku vezikisa vantu vose.—Njenisisi 22:18; Yelemiya 31:31-33; 1 Petulu 2:9; Ku-Solola 5:9, 10; 14:1-3.
Veya va na pande ku lia ku mbolo na ku nua ku viniu via Mulalelo? Vaze va kala mu litavasiano lia lihia, vaze va ka ya muilu, vakevo lika va na pande ku lia na ku nuako. Sipilitu santu ikeyo ye ku va leka ngecize va va hangula linga va ka pue vamiangana muilu. (Loma 8:16) Kaha va kala naua mu litavasiano lia Vuangana na Yesu.—Luka 22:29.
Ambaco vaze va lavelela ku ka yoya miaka yose mu Palandaizi ha mavu? Ve ku ononoka lisiko lia Yesu lia ku kunguluka ku Mulalelo ua Muangana, vunoni ve ku tala lika na kasingimiko, ka ve ku lia ku mbolo cipue ku nua ku viniu. Vakaleho va Yehova ve ku linga cilika ca Mulalelo ua Muangana, lumo mu muaka, lia 14 ya Nisane mu nima ya ku lahuka ca litangua. Vutuhu mu mavu ose va vandende lika vakua ku ya muilu, kasi eci cilika ca pua ca seho ku Vakua Kilistu vose. Ya pua ntsimbu i ve ku pangesa vose ve ku yako, mu ku singanieka ha cilemo ca kama ca muesa Yehova Njambi na Yesu Kilistu ku vantu.—Yoano 3:16.
Halumo mu Hasa ku Lema Naua Evi
MULALELO
Vulukenu Ku-Tsa ca Yesu
Tua mi lania na ndzolela ya vutuntu mu ka likungulule netu ku cilika eci ca seho ya kama. Mu ka lilongesa vati muono ua Yesu na ku-tsa ceni vi hasa ku mi vezikisa muntu ku muntu.
VIHULA VI VE KU LINGA CIKUMA VANTU
Omo lia Vika Vakaleho va Yehova ve ku Linga Mulalelo ua Muangana mu Cifua ca Liseza na Malombelo Akuavo?
U va luka naua nguavo Via-ku-lia via Muangana ni Mulalelo, ukeuo ua pua ciuano ca seho ya kama ku Vakaleho va Yehova. Tantekeyenu mizimbu ikuavo ku tuala ha ciuano caco ya kala mu Mbimbiliya.
