VIMPANDE VIA KU VUEZAKO
Vika Vukalo vua Vatsi?
MU MBIMBILIYA ya Luchazi, lizi lia ciHevelu sheʼohl na lizi lia ciNgelengu haides va lilundulula nguavo ‘Vukalo vua Vatsi.’ Aa mezi aco a solokamo lua ku pua 70. Ose avali a kundama ku ku-tsa. Vimbimbiliya vimo via lundulula mezi aco nguavio, “cihilo,” “cipuku” ni “cina.” Vunoni mu malimi a engi ka mua kele mezi a lombolola mpundu aa mezi avali a ciHevelu na ciNgelengu. Amba lizi Vukalo vua Vatsi lia lomboloka vika mpundu? Vuovuno honi tu hilulenu vati va pangesa eli lizi ha vinimbu via ku liseza-seza mu Mbimbiliya.
Ekelesiaste 9:10 nguayo: “Ka kuesi cipanga, cipue vutumbe, cipue mana, cipue Mangana, ku Vukalo vua Vatsi, ku u ku ya.” Vuno eci ca lomboloka ngecize Vukalo vua Vatsi ca pua mpundu cihilo ni cina ci tua tsindile umo kavusoko ketu ni? Houe. Muomu nga Mbimbiliya i tumbula cihilo ca muntu ye ku pangesa mezi eka a ciHevelu na ciNgelengu, kati sheʼohl na haides. (Njenisisi 23:7-9; Mateo 28:1) Kaha Mbimbiliya ka ya pangesele lizi “Vukalo vua Vatsi” mu ya handeka ha cina ci va tsinda vantu va vengi, ngeci mua cihilo ca vusoko ni cihilo ca mbunga.—Njenisisi 49:30, 31.
Amba cihela cika va luka nguavo “Seol”? Lizi lia Njambi lia muesa ngecize “Vukalo vua Vatsi,”ni nguetu “Seol” ca pua cihela ca kama ku tuvakana na cihilo ca mbunga. Isaya 5:14 ya handeka ngecize Vukalo vua Vatsi vua ‘kama kaha vu na asama kanua kavuo mu ku hiana na seteko.’ Vutuhu Vukalo vua Vatsi vua hitisa mbunga ya ingi, ca soloka ngecize ka vue ku kuta muomu kasi vu ci tonda vantu. (Visimo 30:15, 16) Vua liseza na vihilo vize vi tu hasa lika ku tsinda vantu va ku puamo, ‘Vukalo vua Vatsi na Ku-Nonga ka vie ku i kuta.’ (Visimo 27:20) Vukalo vua Vatsi ka vue ku sula, muomu ka vua kele noho ha vua lengela. Ngeci mukemuo Vukalo vua Vatsi ka vua puile cihela mpundu. Vunoni vua pua cihela ca cimueso cize ka tu hasa ku mona, kuze ku ve kuya vantu vose va li na ku tsa.
Vi ya longesa Mbimbiliya ku tuala ha cisangukilo vi hasa ku tu kuasa ku tantekeya mua cili via lomboloka ano mezi “Seol” na “Hades.” Mbimbiliya ya muesa ngecize vantu va tsa vali mu “Seol” ni “Hades” tangua va ka sanguka. * (Yombi 14:13; Vilinga 2:31; Ku-Solola 20:13) Mbimbiliya ya muesa ngecize vose vali mu Vukalo vua Vatsi tangua va ka sanguka cipue nga va pangelele Njambi ni kuahi. (Njenisisi 37:35; Visamo 55:15) Ngeci Mbimbiliya ya longesa nguayo ku ka kala “cisangukilo ca vakua vuviuke na vakua vuhenge.”—Vilinga 24:15.
^ cin. 6 Ku tuala ha vatsi vaze ka va ka sanguka, Mbimbiliya ya muesa ngecize kavesi mu Seol ni Hades vunoni vali mu “Ngehena.” (Mateo 5:30; 10:28; 23:33) Vunoni ngeci mua Seol na Hades, Ngehena ka ca puile cihela mpundu ci tu hasa ku mona.
