VIMPANDE VIA KU VUEZAKO
Yesu Kilistu—Mesiya u va Kulahesele
YEHOVA NJAMBI ua tumine vapolofeto va vengi ku soneka via ku-iza ca Mesiya: ku semuka ceni, cipanga ceni ca ku ambulula na ku tsa ceni mu ku pua muovole uetu. Linga a tu kuase ku tantekeya Mesiya. Vupolofeto vuose vu va sonekele vua lipuisilemo muli Yesu Kilistu. Vupolofeto vuaco vua pua vua ku sungama kaha va vu handeka ha toma. Tu simutuilenu vumo vupolofeto vua lomboluele viuma vie ku solokele ha ku semuka ca Mesiya na vunike vueni.
Kapolofeto Isaya ua handekele vua lumo ngueni Mesiya a ka fuma ku cikota ca Muangana Ndaviti. (Isaya 9:7) Yesu ua semukilile mpundu ku cikota ca Ndaviti.—Mateo 1:1, 6-17.
Kapolofeto mukuavo ua lizina Mika, ua handekele ngueni kanike a ku pua muangana kaha a ka semukila mu “Mbetelema Efalata.” (Mika 5:2) Mu ntsimbu ya semukile Yesu, mu Isaleli mua kele vimbonge vivali vi va lukile Mbetelema. Imo ya kele ku vucelo ku hiehi na mbonge ya Nazaleta, ikuavo ya kele ku hiehi na Yelusalema mu Yundeya. Mbetelema ya ku hiehi na Yelusalema laza va i tumbuile nguavo Efalata. Mu mbonge eyi, mukemuo mua semukilile Yesu, ngue mu vua handekele vupolofeto!—Mateo 2:1.
Vupolofeto vukuavo vua mu Mbimbiliya vua handekele ngecize Muana Njambi va mu “sanene ku Ingito.” Yesu tele a ci li kanike, va mu tualele ku Ingito. Va mu hiluisile lika mu nima ya ku-tsa ca Helonde, ngeci mukemuo ovu vupolofeto vua lipuisilemo.—Hoziya 11:1; Mateo 2:15.
Mu cikasa cili ha lifo 200, mikanda i vana soneka muintsi lia mutue “ Vupolofeto” hali vimpande via handeka ha ku-iza ca Mesiya. Aci setekesenu ovu vupolofeto ku visoneka vili muintsi lia mutue “Ku Lipuisamo.” Ku linga ngoco ci ka kolesa lutsilielo luenu mu vusunga vua Lizi lia Njambi.
Omo mu hilula ha visoneka evi, vulukenu ngecize mua hitile vihita via miaka mu va sonekele vupolofeto vuaco amba vuose Yesu ua semukile. Yesu ua handekele ngueni: “Viuma viose vi va sonekele ku mezi a lisiko a Mosesa na ku vapolofeto na ku visamo, via ku nji tumbuola ange, via pandele ku puisamo.” (Luka 24:44) Vupolofeto vuaco vua lipuisilemo mpundu—ngue mu mu na limuena mu Mbimbiliya yenu!
