MBIMBILIYA ka ya tumbuile ngonde ya semukile Yesu. Vunoni ya tu hana vukaleho vua vusunga vu tu lingisa ku handeka nguetu Yesu ka semukile mu ngonde ya Dezembro.

Aci singaniekenu lika vati ya fuile ngonde yaco mu Mbetelema, mu mbonge ya semukilile Yesu. Ngonde ya vaYundeya ya Ciseleve (ya litombola na Novembro/Dezembro) ya puile ngonde ya masika na niondzi. Kaha kua hatele ngonde ya Tevete (Dezembro/Janeiro). Nayo ya puile ngonde ya masika kaha ha mincinda ha kele mbundu. Tu talenu vi ya handeka Mbimbiliya ku tuala ha cifua ca ntsimbu ku cihela cize.

Mukua ku soneka Mbimbiliya Ezela, ua muesa ngecize ngonde ya Ciseleve ya tsimanene ku masika na niondzi. Mu nima ya ku handeka ngecize, vantu va likunguluile mu Yelusalema mu “ngonde ya mu citanu na ziuana [Ciseleve] ku litangua lia mu makumi avali lia ngonde” Ezela ua handekele ngueni va kele ‘na ku zaza omo lia mema a kama a ku noka.’ Ku tuala ha cifua ca ntsimbu mu vingonde vize, vantu va likunguluile  na ku handeka nguavo: “Ino ntsimbu ya mema a engi, kaha ka tu hasa ku mana ha mbandza.” (Ezela 10:9, 13; Yelemiya 36:22) Eci cikeco ca lingisile tuniungi ku cihela cize ku hona ku kala ha mbandza na matanga avo mu Dezembro!

Mbimbiliya ya muesa ngecize ku vutsiki vua semukile Yesu tuniungi va kele ku musenge mu ku niunga matanga avo. Luka umo ua vakua ku soneka Mbimbiliya ua sonekele ngueni ku ntsimbu ize kua kele vamo tuniungi “va kele ku musenge, va niungile vutanga vuavo ku vutsiki” mu hiehi na Mbetelema. (Luka 2:8-12) Aha va na muesa ngecize tuniungi va kele mpundu ha mbandza ka va kele lika na ku lisa matanga avo ku mutana houe. Vakele na ku niunga matanga avo ku musenge ku vutsiki. Ku liya neyi mizimbu ya niondzi na masika, citava tu handeke nguetu tuniungi va kele ha mbandza mu Dezembro ku Mbetelema ni? Houe. Muomu, viuma vi va lingile vantu mu ntsimbu ya semukile Yesu via muesa mpundu ngecize ka semukile mu Dezembro. *

Mbimbiliya ya handeka kamandende lika ha ku semuka ca Yesu, vunoni ya lombolola mua cili via ku-tsa ceni. Eci ci tu vuluisa mezi a sonekele Muangana Solomone, ngueni: “Lizina lia cili lia hiana mazi a seho ya kama; na litangua lia ku-tsa lia hiana litangua lia ku-semuua ca muntu.” (Ekelesiaste 7:1) Eci ci tu kuasa ku ivuisisa omo lia vika Mbimbiliya ya handeka cikuma ha ku ambulula ca Yesu na ku-tsa ceni. Vunoni ya handeka lika kamandende ha ku semuka ceni.