ACI tale mavu ali aha! tala viose viliho, oco ku viuka! Tala muila na miti, vintemo na tusitu vose. U hasa ku inika iya njamba na veya vandumba ni?

Kuli ca fumine eci citungu ca cili? Tu ci mone vati Njambi ua tu viukisilile mavu.

Ha katete, Njambi ua tangele muila linga u fuike ha mavu. Kaha ua tangele vifua viose via visoka via vindende na viputa na miti. Evi visoka vie ku lingisa mavu ku moneka  mua cili. Vunoni via kala na seho ikuavo. Cingi cavio vie ku ima vusuka vua ku tovala cikuma.

Kaha Njambi ua tangele vantsi linga va kale mu mema na tuzila linga va pulule muilu. Ua tangele tutali na tumbixi na tuvalu; tusitu va vandende na va kama. Tusitu vaka va kala muimbo lienu? Tua pande ku viukilila cikuma omo lia viuma viose evi via tu pangelele Njambi!

Mu ku manusula, Njambi ua viukisile naua umo mutamba ua mavu linga u vuahe cikuma. Eci cihela ua ci lukile ngueni citungu ca Endene. Ca puile ca cili cikuma. Viose via kelemo via puile via ku viuka. Kaha Njambi ua tondele ngueni mavu ose a pue ngue eci citungu ca cili ca tangele.

A ci tale naua ha fikula yeci citungu. Ua tantekeya viuma vika Njambi ua muene ngueni vi na lisupuho ni? Tu ci tale..