NGA U MONA muntu ua laha ngue ha kasongua ka ndzivo yove a li na kuiza kuli yove vati u ivua? Ou muntu uaco na pande kupua lika likisikisi kati ueka! Ntsimbu imo ha mavu ha kele makisikisi. Mbimbiliya ya handeka nguayo va iseavo va puile tungelo. Omo naua vati?

Vuluka nguove, uze kangelo ua ku pihia Satana ua kele na ku fuitangana mu ku koka visoti. Ua esekele naua tungelo va Njambi linga va pange vupi. Mu ku hita ca ntsimbu, vamo tungelo va sangumukile ku halakana kuli Satana. Va likelele ku linga vipanga via va hele Njambi muilu. Kaha va zalele mivila ya vuntu. Ua tantekeya omo lia vika?

Mbimbiliya nguayo muomu ava vana va Njambi va muene vampuevo va cili ha mavu kaha va tondele ku kala navo. Ngeci vezile ha mavu na ku ambata ava vampuevo vaco. Mbimbiliya ya handeka nguayo va lingile vuhenge, muomu Njambi ua tangele tungelo linga va yoyele muilu.

Omo tungelo na vampuevo vavo va semene vana, vana vaco va lisezele na vakuavo vose. Ha katete ka va litepele cikuma. Vunoni va putukile ku hama na ku tuntuka cikuma-kuma na ku pua vakua ngolo, noho va puile makisikisi.

Ava makisikisi va puile va ku pihia. Kaha muomu va puile va kama va kele na ngolo ya kama, ya ku vulumuna vakuavo. Va kele na ku kakateya vantu ku linga vupi ngeci muavo.

Enoke ua tsile vunoni kua kele yala mukuavo ha mavu ua puile muntu ua cili. Lizina lieni Noa. Ntsimbu yose ua lingile vize via mu tumine Njambi.

Tangua limo Njambi ua lekele Noa ngueni ntsimbu ya puilemo ya ku nongesa vantu va vapi. Vunoni Njambi ue ku ovuele Noa, na va vusoko vueni na tusitu va vengi. Tu tale vati Njambi ua vi lingile.