TALA vili na ku lingika aha. Andama na Eva va li na ku va sekula mu citungu ca cili ca Endene. Ua tantekeya omo lia vika?

Muomu va na lingi vimo via ku pihia cikuma. Ngeci Yehova a li na ku va hana kasitiku. Ua tantekeya viuma vika via ku pihia vi va na lingi va Andama na Eva ni?

Va na lingi viuma via va vindikile Njambi. Njambi ua va tavesele ku-lia ku miti ya mu citungu. Vunoni kua kele muti umo ua va vindikile ngueni kati va lieko, nga va liako va tsa. Vusuka vua uze muti ka vua puile vuavo. Kaha ngue mu tua tantekeya ca pua vupi ku nona cuma ca mbala, ni kati mukemuo? Vati via putukile?

Tangua limo omo Eva ua kele lika lieni mu citungu, kaha linoka ua handekele neni. Aci singanieke! Linoka ua lekele Eva linga a lie ku vusuka vua uze muti ua va vindikile Njambi. Vunoni Yehova mua tangele manoka ka va tangele linga va pue na ku handeka. Eci ci tu kuasa ku mona nguetu kua kele umo ua lingisile uze linoka ku handeka. Iya honi ua lingilemo?

Kati Andama. Eci ci lekesa ngecize kua kele umo ku vaze va tangele Yehova ha katete tele kanda aci tange mavu. Ava vaco vapua tungelo, ka tu hasa ku va mona. Ou kangelo ua kele na cipululu ca kama. Kaha ua putukile ku singanieka ngueni a pue muangana ngeci mua Njambi. Ua tondele vantu va lemese ikeye kati Yehova. Ou kangelo uaco ikeye ua lingisile linoka ku handeka.

Ou kangelo ua hasele ku-onga Eva. Mua mu lekele ngueni nga a lia ku vusuka vua muti a ka pua ngue Njambi, Eva ua tavele. Ngeci ua lile kaha Andama neni ua lile. Andama na Eva va muesele lisino kuli Njambi, ngeci va zimbaleselele cihela cavo citungu ca cili.

Vunoni tangua limo Njambi aka lingisa mavu ose ku pua naua a cili, ngue mu ca puile citungu ca Endene. Ku lutue tu ka lilongesa vati nove u hasa ku kuasa mu cipanga caco. Vunoni tu ci mone vuovuno vika via solokele kuli va Andama na Eva.