VAZE kava kovelele mu vuato, va tualeleho kulinga vupi. Kasi ka va tavele nguavo Livazi li kuiza. Va kele mu ku zola na ku sembulula Noa. Vunoni mu ntsimbu ya indende vizolo viavo via lengele.

Mu ntsimbu imo lika mema a pukile ku noka. Mema a mbalumukile kuilu ngue muze mu ue ku mbalumuna mema mu ciyenjo. Noa ua handekele vusunga! Vunoni vose va kele kumbandza ka va hasele naua ku kovela mu vuato muomu va kotokelele cikuma. Yehova tele na pata laza ku lipito.

Mu ntsimbu ya indende mavu ose a zavamene mu mema. Mema a puile ngue vindonga via kama. A uisile miti, a langumuine mavue a kama, na ku neha muyoyo ua kama. Omo lia vuoma vantu va  sangumukile ku londa ku mincinda ya laha. Kaha va putukile ku liveya nguavo nga tua halakanene Noa nga tua kovelele mu vuato tele mbelo i ci li ya casi! Vunoni va kotokelele cikuma.

Mema a tualeleleho kuli vuezelela. Niondzi yaco ya nokele matangua 40 na matsiki 40. Mema a londele ku mikulo ya mincinda, mu ntsimbu ya indende, mincinda yose ya laha cikuma ya zimukile mu mema. Ngue muze mua handekele Njambi vantu vose na tusitu vose va kele kumbandza va tsile. Vunoni vaze va kele mu vuato vovokele.

Noa na vana veni va lingile vipanga via cili mu ku tunga vuato. Mema a zunduile vuato, kaha vua hungumukile. Tangua limo, mu ya cele niondzi, mutana ua putukile ku tua ceke. Ca puile cikomoueso ca kama! Helu lia mavu ha kele mema a engi. Cuma ca monekele lika ca puile vuato vua kele na ku hungumuka helu lia mema.

 Makisikisi vose va nongele. Ka va keleko naua linga va vulumune vantu. Vose va tsile na vanayavo kaha na vantu vakuavo vose vakua kulinga vupi va tsile. Vika co via solokele kuli va iseavo?

Va ise ya makisikisi ka va puile vantu ngeci muetu. Va puile tungelo vaze vezile mukua ku yoyela ha mavu ngue vantu. Ngeci mukemuo mu liezile Livazi ka va tsile hamo lika na vantu. Va likelele ku pangesa mivila ya vuntu i va lipangelele, kaha va hilukile muilu na mivila ya vungelo. Vunoni ka va va tavele ku hilukila ku vusoko vua tungelo va Njambi. Ngeci va puile tungelo va Satana. Mu Mbimbiliya va va luka nguavo vandemone

Njambi ua hitisile luhundzi ha mavu, kaha mema a putukile ku tepuluka. Mu nima ya vingonde vitanu vuato vua tutikile helu lia umo muncinda. Mua hitile matangua a engi, kaha vaze va kele mu vuato va hasele ku tala hambandza na ku mona vintsongo via mincinda ikuavo. Mema a tualeleleho ku tepuluka.

Kaha Noa ua tumine kazila ua ku lava iva luka nguavo likololo. Likololo ua puluile mu ntsimbu ya indende kaha na ku hiluka mu vuato muomu ka uanene cihela ca ku tongama. Vintsimbu viose via mu tumune Noa, likololo kasi ua hilukile kuli ikeye mu vuato.

Noa ua tondele ku tantekeya nga mema a nomu, kaha ua tumine naua livembe. Vunoni livembe neni ua hilukile muomu ka uanene ha ku tongama. Noa ua mu tumine lua mu civali, kaha livembe ua nehele limo lifo lia muti ua olivela ku kanua keni. Ngeci Noa ua tantekeyele ngueni mema a na niekumuka. Noa ua tumine naua livembe lua mu citatu, amba vuose livembe ua uanene cihela ca ku kala.

Njambi ua handekele na Noa ngueni: ‘Tuhuka mu vuato hamo lika na va vusoko vuove na tusitu vose.’ Va kele mu vuato matangua a tuvakana muaka umo. Va vuile ndzolela ya kama omo va tuhukile mu vuato!