TALA ha vifikula. Fikula na fikula i li na ku muesa cimo ca vipupu via lingile Yehova mu Ingito. Tala ha fikula ya ku livanga u mone Alone a veta mulamu ueni mu Ndonga ya Nilu. Mua vetelemo, mema ose mu ndonga a himpukile maninga. Vantsi vose va tsile kaha ndonga yose ya putukile ku nika.

Lia mukuavo, Yehova ua lingisile vindzunda ku capuluka mu ndonga ya Nilu. Ngeci vasulile kuose, mu vifornu na viforma via kuocela mbolo na mu vihondo via vantu, va kele kuose. Vindzunda vaco mu va tsile vakua Ingito va kele na cipanga ca ku va kunguiya kaha va nikile helele.

Kaha Alone ua vetele mulamu ueni ha mavu kaha mpumputa ya fumineho ya himpukile tungenengene. Tungenengene vapua tulongolo va vandende, ve ku pulula na ku suma. Ava tungenengene va puile cipupu ca mu citatu mu Ingito.

Kaha vipupu viose via hateleko via talekesele lika ku vakua Ingito, kuli vaIsaleli kuahi. Cipupu ca mu ciuana ca puile ca vandzindzi, va sulile mu vindzivo via vakua Ingito vose. Cipupu ca mu citanu ca ile ha vimuna. Vangombe, vampanga na vampembe va ku Ingito va tsile.

 Ku fuma haze Mosesa na Alone va ka kunduile muto na ku uasa muilu. Kaha ua nehele mahote via ku hiatula cikuma ha vantu na tusitu. Eci capuile cipupu ca mu citanu na cimo.

Kaha Mosesa ua katuile mavoko eni muilu kaha Yehova ua nehele liniondzi lia civue na mihiato. Liniondzi lia kama lia ku linga kanda li ci nokeho mu Ingito.

Cipupu ca mu citanu na vitatu ca puile vambimba. Kanda va ci kaleko vambimba va cifua cize mu Ingito. Kaha va lile viose via lisupile ku civue.

Cipupu ca mu citanu na viuana ca puile milima. Mu matangua atatu milima ya sulile kuose, vunoni ku va kele vaIsaleli kua tuile ceke.

Kaha mu ku sulumuina, Njambi ua tumune vantu veni ku kuita maninga a muana mpembe ni muana mpanga ha mapito avo. Kaha kangelo ua Njambi ua hitile mu Ingito. Kaha omo kangelo ua muene hose ha mbelo ha kele maninga, ka tsihile na umo uahi mu ndzivo yaco. Vunoni mu vindzivo vize ka va kuitile maninga ha mbelo, kangelo ua Njambi ua tsihilemo muana ua katete ku vantu na vimuna vose. Evi vikevio vipupu 10.

Munima yevi vipupu 10, Falao uecele vaIsaleli va ye. Kaha vantu va Njambi vose va li viukisilile ku ya, kaha ku vutsiki vuze vene va katukile na ku tuhuka mu Ingito.