UNA mono vika ali na ku linga Avilahama aha? Na kuata mpoko, ngue a tonda ku tsiha muaneni. Vika a tonda ku mu tsihila? Ha katete tu ci tale vati Avilahama na Sala va semene muanavo.

Vuluka nguove, Njambi ua va kulahesele ngueni va ka kala na muana. Vunoni ca puile ca cikalu ku meso a vantu, muomu Avilahama na Sala tele va na kulupa laza. Vunoni Avilahama ua kulahelele ngueni Njambi a hasa ku linga viuma vize vi va mona vantu nguavo ka citava ku vi linga. Vika via lingiuile?

Fume ha mu kulaheselele Njambi, mua hitile muaka ua mutuntu. Omo Avilahama ua puisile miaka 100 kaha Sala miaka 90, va semene muana ua yala lizina lieni Isake. Njambi ua puisilemo cikulaheso ceni!

Vunoni omo Isake ua kolele, Njambi uesekele lutsilielo lua ise Avilahama. Ua tambakanene ngueni: ‘Avilahama!’ Kaha Avilahama ua kumbuluile ngueni: ‘Yange uno!’ Kaha Njambi ngueni: ‘Ambata muanove, muanove umo lika, Isake, kaha ya ku muncinda u nji ka ku inikila. Kuze u ka tsiha muanove na ku mu hana ngue cikombelo.’

Mezi aa a vuisile Avilahama vusiua vua kama, muomu Avilahama ua lemene cikuma muaneni. Kaha vuluka nguove, Njambi ua sikile Avilahama ngueni vana veni va ka tunga mu cifuti ca Kanana. Vati evi vie ku lipuisilemo nga Isake ua tsile? Vutuhu ka ca mu lombolokele, Avilahama uononokele kuli Njambi.

Omo Avilahama ua hetele ku muncinda, ua kutile muaneni na ku mu haka ha mutula ua tungile. Kaha ua nonene mpoko linga a mu tsihe. Vunoni ha ntsimbu ize vene kangelo ua Njambi ua mu tambakanene ngueni: ‘Avilahama, Avilahama!’ Kaha Avilahama ua kumbuluile ngueni: ‘Yange uno!’

Njambi ua handekele ngueni: ‘Kati u vulumune kanike cipue kati u mu linge na vimo viahi, vuovuno nji na tantekeya nguange ua nji tsiliela, muomu ka ua nji vianene muanove, muanove umo lika.’

Cili Avilahama ua muesele lutsilielo lua kama muli Njambi! Ua kulahelele ngueni na vimo viahi via honoua Yehova, citava Yehova nga ua hasele ku  sangula Isake. Ka ca puile cizango ca Njambi linga Avilahama a tsihe Isake. Ngeci Njambi ua lingisile muana mpanga ku sakamena mu ciputa, linga Avilahama a mu pange cikombelo ku sintsila muli muaneni.