TALA ou kakeke mua lila oku na kuata ku munie ua mpuevo. Ikeye Mosesa. Ua tantekeya iya ou mpuevo ua ku lelema, ni? Muana Falao muangana ua Ingito.

Naye ya Mosesa ua mu suekele noho ua puisile vingonde vitatu, muomu ka tondele linga va mu tsihe ku vakua Ingito. Vunoni omo ua muene ngueni Mosesa va hasa ku mu uana ngeci ua mu suekele.

Ua pangele cimo cikasa kaha ua ci sotele na mbetume na ngongosi linga kati ci vombele mu mema. Kaha ua hakelemo Mosesa, na ku mu sueka mu cikasa mu cihongo ca laha ku mukulo ua Ndonga Nilu. Miliame ndumbu ya Mosesa, va mu tumine ku niunga ou kakeke uaco.

Mu ntsimbu ya indende, muana Falao ua sikulukile ku Ndonga Nilu mu ku tana. Kaha ua muene cikasa mu cihongo. Ua tumine ngamba yeni ua mpuevo ngueni: ‘Ya u ka nji hiangele cize cikasa.’ Kaha omo muana Falao ua fukuilemo ua uanenemo umo kakeke ua cili! Kakeke Mosesa ua kele na ku lila kaha muana Falao ua mu vuilile ngozi. Ka tondele linga va mu tsihe.

Ngeci Miliame uezile. Tala, ou ali aha ha fikula. Miliame ua hulile muana Falao ngueni: ‘Citava nji ka ku tondele mpuevo ua ka Isaleli linga a ku kuase kulela ou muana, ni?’

Kaha ua tavele ngueni: ‘Hamoye.’

Miliame ua ile vuasi-vuasi mu ku ka sana naye. Muezile naye ya Mosesa, muana Falao ua mu lekele ngueni: ‘Tambula ou kakeke u ka nji leleleye, kaha nji ka ku fueta.’

Ngeci mukemuo naye ya Mosesa ua lelele muaneni ivene. Kaha Mosesa mua kolele, naye ua mu tualele kuli muana Falao, linga aka mu puise muaneni. Omu mukemuo mua kolele Mosesa ku ndzivo ya Falao.