ULI na ku ivua nkeke ya ou yala a li na ku vavala, ni? Lizina lieni Yombi kaha ou mpuevo ikeye Mpueyeni. Ua tantekeya vika a li na ku leka Yombi ni? ‘Sahula Njambi linga u tse.’ Tu ci mone omo lia vika ua handekelele mezi a ku pihia ngoco na vika Yombi ua yandelele cikuma.

Yombi ua puile mukua ku tsiliela na ku ononoka Yehova. Ua tungile ku cifuti ca Uze, kati ku laako cikuma na Kanana. Yehova ua lemene cikuma Yombi, vunoni kua kele umo ua mu zindile. Ua mu tantekeya ni?

Ikeye Satana Ndiavu. Vuluka nguove, Satana ua pua kangelo ua mupi, ua zinda Yehova. Ua lingisile va Andama na Eva ku muesa lisino kuli Yehova. Ngeci mukemuo, ua singaniekele ngueni a hasa ku lingisa vantu vose ku muesa lisino kuli Yehova. Ua haselemo ni? Houe. A ci singanieke ha vantu vakua lutsilielo va tua lilongesa. Vangahi u hasa ku tumbula mazina?

Fume ha ku tsa ca Yakomba na Yosefe mu Ingito, Yombi ua puile yala ua lutsilielo lua kama ha mavu ose. Yehova ua tondele ku lekesa Satana ngueni ka hasa ku tangula vantu vose ku linga vupi. Ngeci ua mu lekele ngueni: ‘ Tala Yombi. U mone lutsilielo lua kama luali naluo muli yange.’

Satana na tavako na sembulule ngueni: ‘Ua tsiliela, muomu u na mu vezikisa na ku mu hana viuma via vingi via cili. Vunoni nga u mu tambulavio, a ka ku viana.’

Kaha Yehova ngueni: ‘Ya u ka mu tambulevio. Mu linge viose via ku pihia vi u tonda. Kaha tu ka mona nga a nji viana. Vunoni kati u mu tsihe.’

 Ha katete, Satana ua tumine vezi ku punda vangombe na tumelu kaha na ku tsiha vampanga va Yombi. Kaha ua tsihile vana veni 10 va vampuevo na va vamala na liniondzi lia civue. Mu ku hatako, Satana na vete Yombi na vuvezi vua ku pihia. Yombi ua yandele cikuma. Ngeci mukemuo mpueyeni ua mu lekele ngueni: ‘Sahula Njambi linga u tse.’ Vunoni Yombi na viana. Kaha vamo vavusamba veni vatatu va makuli vezile na ku mu paya nguavo ua yoyele muono ua ku pihia. Vunoni Yombi kasi ua tualeleleho ku tsiliela.

Eci ca zolelesele cikuma mutima ua Yehova, ngeci ua vezikisile Yombi, ngue mu u na mono aha ha fikula. Ua kanguisile vuvezi vueni. Yombi ua semene naua vana vakuavo 10, va cili. Kaha ua mu hele luvali ku vize via fukile ku nima ngeci mua vangombe, vampanga na tumelu.

Nove u ka tsiliela Yehova ntsimbu yose ngue mua lingile Yombi ni? Nga u ka linga ngoco, Yehova a ka ku vezikisa nove naua. U ka yoya miaka yose omo mavu va ka a viukisa ngue citungu ca Endene.