UA TANTEKEYA iya ou muana mpuevo a li aha ha fikula? Lizina lieni Lembeka. Ou yala a ka liuana neni ikeye Isake. Lembeka aka pua mpueyeni. Vati viendele?

Ca puile ngecize, Avilahama ua tondele ngueni muaneni Isake ambate mpuevo ua cili. Ka tondele ngueni Isake ambate mpuevo ua mu Kanana, muomu va puile vakua ku lemesa vanjambi va makuli. Ngeci ua sanene ngamba yeni kaha ua mu lekele  ngueni: ‘Nji tonda nguange u hiluke ku va vusoko vuange, ku Halane u ka tondeleko muanange Isake mpuevo.’

Ha ntsimbu ize vene ngamba ya Avilahama ua ambatele tumelu likumi kaha ua ile vungendzi vua ntunda ya kama. Omo ua ka hetele ku hiehi na limbo lia va vusoko vua Avilahama, ua tulile ha lisima. Ca puile cinguezi, ntsimbu i va kele na kuiza vampuevo va mu mbonge mu ku sua mema ha lisima. Kaha ngamba ya Avilahama ua vundilile kuli Yehova ngueni: ‘Ci linge ngecize, uze muana mpuevo a ka tava ku nji hana mema a ku nua kaha na ku nuisa naua tumelu vange, a pue uze u ua hangula linga aka pue mpuevo ya Isake.’

Haze vene, Lembeka uezile mu ku sua mema. Omo uze ngamba ua mu vundilile mema, ua mu hanene. Kaha ua hilukile ha lisima na ku suila tumelu veni vose mema a ku nua. Ca puile cipanga ca kama, muomu tumelu ve ku nua lu mema lua luingi.

Omo Lembeka ua manusuile cipanga eci, ngamba ya Avilahama ua mu hulile lizina lia ise. Kaha ua mu hulile naua nga citava ku ka kosa ku ndzivo yavo. Lembeka ua mu kumbuluile ngueni: ‘Tata ikeye Mbetuele, kaha na hondo i u hasa ku ka kosa ku ili.’ Omo Ngamba ya Avilahama ua tantekeyele ngueni Mbetuele ua puile muana ua Nahole muanaye ya Avilahama. Ua tsikamene na ku santsela Yehova mu ku mu tuamenena ku va vusoko vua Avilahama.

Ku vutsiki vuze, Ngamba ya Avilahama ua tangele muzimbu ua mu nehele kuli Mbetuele na Lambane ndumbu ya Lembeka. Vose vavali va tavele, linga Lembeka a ye neni a ka pue mpuevo ya Isake. Vati Lembeka ua kumbuluile mu va mu handekeyele? Ua tavele ngueni ‘Eyo,’ muomu ua tondele ku ya. Lia mukuavo vene va ambatele tumelu na ku enda naua livungendzi lia ku hiluka ku Kanana.

Va ka hetele ku cinguezi. Lembeka ua muene yala a li na ku endangana mu cana. Yala uaco ua puile Isake. Isake ua viukilile mu ku mona Lembeka. Isake tele a cili na vusiua vua naye Sala muomu mua hitile lika miaka itatu fume ha ku tsa ceni. Vunoni Isake ua putukile ku lema cikuma Lembeka kaha ua kele na ndzolela ngue muze mua laza.