YOSEFE na hono ku lisimpitika. Ngeci na leka vangamba veni linga va tuhuke mu hondo. Omo na sala lika na vamuanaye, a putuka ku lila. Vamuanaye vana komoka, muomu ka va tantekeya via a li na ku lila. Kaha ua va leka ngueni: ‘Yange Yosefe. Tata kasi a li na muono, ni?’

Vamuanaye va na komoka cikuma ka va hasa na ku handeka. Vali na kuivua vuoma. Vunoni Yosefe ngueni: ‘Suenenu kuno.’ Omo va na mu suena ua handeka ngueni: ‘Yange Yosefe ntsongo yenu, uze u mua landesele ku Ingito.’

Yosefe ua handeka na vamuanaye na ngozi ngueni: ‘Kati mu vavalese mitima yenu omo lia ku nji landesa kuno. Njambi ikeye ua nji tumine ku Ingito mu ku ohiela vantu. Falao na nji puisa muangana  mu cifuti cose. Hilukenu vuasi-vuasi kuli tata mu ka mu leke viuma evi. Kaha mu ka mu neha linga a ku tunge kuno.’

Yosefe ua livumbatelele na vamuanaye na ku va tsuemba vose. Omo Falao nevu nguavo vamuanaye ya Yosefe va neza, ua leka Yosefe ngueni: ‘Va leke va ambate matemba linga va ka nehe Iseavo na vusoko vuavo linga veze. Nji ka va hana cihela ca cili mu Ingito.’

Ngeci va lingilemo. Ua mono Yosefe mua na livumbatela na ise omo ikeye na vusoko vuose va neza ku Ingito.

Vusoko vua Yakomba vu na li vuezelela cikuma. Yakomba na vana veni na vatekulueni vose va puile 70, mu va nungulukilile ku Ingito. Vunoni kua kele naua vampuevo vavo na vangamba va vengi. Vose ava va tungile mu Ingito. Va va lukile nguavo: VaIsaleli, muomu Njambi ua aluluile lizina lia Yakomba ku pua Isaleli. VaIsaleli va puile vantu va seho ya kama kuli Njambi, ngue mu tu ka lilongesa ku lutue.