AVA vamala vali na ku pakesa vantu na vipanga. Tala ou yala a li na ku tingula umo mukua vipanga na cikote! Vakua vipanga va ku vusoko vua Yakomba kaha va va sana nguavo vaIsaleli. Kaha ava vamala vali na ku va pakesa, vakua Ingito. VaIsaleli va na va tenge vangamba ku Ingito. Vati viendele?

Vakua ndzivo ya Yakomba va yoyele mu ciyulo miaka ya ingi mu Ingito. Yosefe, uze yala ua seho ya kama mu Ingito mu nima ya Falao, ikeye ua va lelele. Vunoni ku heta haze Yosefe ua tsile. Kaha Falao neni ua tsile, ua tantekeya vika via solokele ni? Falao ua muha, uze ka lemene vaIsaleli, ua sangumukile ku sika mu Ingito.

 Kaha ou Falao ua mupi ua tengele vaIsaleli kupua vangamba veni. Kaha ua hanguile vamala va vukenia na vukuse linga va va pakese. Va kanganiekele vaIsaleli ku fuitangana mu ku tunga vimbonge via Falao. Vutuhu ngoco vaIsaleli va tualeleleho ku lana. Fume haze vakua Ingito va vuile vuoma nguavo vaIsaleli va lilanesa na ku kaniama cikuma.

Ua tantekeya vati ua lingile Falao? Ua handekesele vifunguizi vaze va kele na ku kuasa vampuevo vaIsaleli ku sulumuna, ngueni: ‘Mua pande ku tsiha uose kakeke ua yala a semuka.’ Vunoni vakevo va puile vampuevo va ngozi, ngeci ka va tavele ku tsiha tukeke.

Kaha Falao ua hele eli lisiko kuli vantu veni vose ngueni: ‘Tambulenu tukeke va vamala va vaIsaleli linga mu va tsihe. Kati mu tsihe tukeke va vampuevo.’ Eli lisiko lineha vuoma ni vati? Tu citale vati uovokele umo kakeke ua yala.