LOTE na va vusoko vueni va tungile hamo lika na Avilahama mu cifuti ca Kanana. Tangua limo Avilahama ua lekele Lote ngueni: ‘Tala, ka kuesi cihela ca ku puamo ca ku lisila vimuna vetu. Sukulu kambu tu litepe. Nga u ila ku cimosue, ange nji ka ila ku cilio.’

Lote ua talele cihela. Kaha ua muene umo mutamba ua cili ua cifuti, ca kele na mema na muila ua ku lisa vimuna. Cihela caco ca puile cana ca Yondau. Kaha Lote ua ile kuze na vusoko vueni na vimuna vieni. Kaha va ka tungile ku Sondoma.

Vantu va mu Sondoma va puile vakua ku linga vupi. Lote ua zindile vilinga viavo muomu ua puile muntu ua cili. Njambi neni ua va zindile.  Kaha Njambi ua tumine tungelo vavali linga va ka nangule Lote ngueni a ka nongesa Sondoma na mbonge ya kele ku hiehi nayo ya Ngomola omo lia vupi vuavo.

Tungelo va lekele Lote nguavo: ‘Zangulako! Ambata mpuevo yove na vana vove vavali va vampuevo kaha fumenu muno!’ Lote na vakua ndzivo yeni va kele na vusese, ngeci tungelo va vakuatele ku mavoko kaha va va tuhuile mu mbonge. Umo kangelo ua va lekele ngueni: ‘Tinisenu miono yeni! Kati mu tale ku nima. Tininenu ku mincinda, linga kati mu tse.’

Lote na vana veni va vampuevo vononokele ngeci va tuhukile mu Sondoma. Ka va manene cipue kamandende ka va talele ku nima. Vunoni mpuevo ya Lote ua sembuluile. Mua sondolekele ku mbonge ya Sondoma, uemanene kaha ua talele ku nima. Kaha mpuevo ya Lote ua himpukile ngundzi ya muongua. Ua mu mono aha ha fikula ni?

Tua lilongesaho vimo viuma via seho. Tua lilongesaho ngecize Njambi ue kuohiela vaze va mu ononoka, vunoni vaze ka ve ku mu ononoka vaka zimbalesa miono yavo.