MUA hiti miaka ivali, vunoni Yosefe kasi a li mu kamenga. Mukua ku makela mu ngandza ka mu vulukile. Kaha vutsiki vumo Falao na loto vilota vivali via seho ya kama, kaha a tonda ku tantekeya vika via lomboloka. Ua mono mua na kosa aha, ni? Lia mukuavo ku cimene Falao na sana vantu veni vakua mana na ku va leka vilota vieni. Vunoni va na honoua ku lombolola vilota vieni.

Amba vuose mukua ku makela a vuluke honi Yosefe. Kaha na leka Falao ngueni: ‘Mu nja kele mu kamenga, kua kele umo yala ua hasele ku lombolola vilota.’ Ngeci Falao na tumu ku ka patula Yosefe mu kamenga ha ntsimbu oyo vene.

Falao na leka Yosefe vilota vieni ngueni: ‘Nja muene vangombe 7, va cili va ku hindala. Kaha nja muene naua vangombe 7, va ku hokama na ku hingama. Kaha va ku hokama va lile vaze va ku hindala.

‘Mu cilota ca mu civali nja muene visakasaka 7 via sokele ha cisati cimo lika, via ku sula na vinona. Kaha nja muene  visakasaka 7, via ku zuza na ku hekuiya. Kaha via ku hekuiya via minine via ku viuka.’

Yosefe a lombolola kuli Falao ngueni: ‘Vilota vivali via lomboloka cuma cimo. Vangombe 7 va ku hindala na visakasaka 7 via via-ku-lia via lomboloka miaka 7 kaha vangombe 7 va ku hokama na visakasaka 7 via ku hekuiya, navio naua via lombolola miaka 7. Mu Ingito mu ka hita miaka 7 ya via-ku-lia via vingi. Kaha mu ka hita naua miaka ikuavo 7 ya via-ku-lia via vindende.’

Ngeci Yosefe na leka Falao ngueni: ‘Hangula yala umo ua mangana na ku mu puisa kasongo linga ongulule via-ku-lia mu miaka 7 ya cili. Linga vantu kati va ka landuke mu miaka 7 ya ndzala i ka hatako omo ku ka kala via-ku-lia via vindende.’

Falao ci na mu yi ku mutima. ngeci na hangula Yosefe linga ongulule via-ku-lia na ku vi tulika. Kaha Falao na hangula Yosefe ku pua muntu ua mu civali ua seho ya kama mu Ingito.

Mu nima ya miaka 8 ya ndzala, Yosefe a mona vamo vamala. Ua va tantekeya, ni? Vamuanaye 10! Iseavo Yakomba na va tumu ku Ingito muomu via-ku-lia vinahu mu Kanana. Yosefe na hasa ku nongonona va muanaye, vunoni vakevo ka va hasele ku mu tantekeya. Ua tantekeya omo lia vika? Muomu Yosefe na kolo kaha na zala vuzalo vua ku lifuila.

Yosefe a vuluka honi ngueni tele a cili kanike ua lotele vamuanaye va na tsikama kuli ikeye. Ou muzimbu u ci u vuluka, ni? Yosefe a mona honi ngueni nkuma Njambi ikeye ua mu tumine ku Ingito, kaha ua mu tuminine vutumbe vua cili. Mu ku mona cove, vika ua lingile Yosefe? Tu ci tale.