MOSESA ua ku hetele na ku muncinda ua Holeve mu ku tonda vulilo vua cili vua ku lisila vampanga veni. Kuze ua muene ciputa ci li na ku sukuma vunoni ka ca uemene!

Mosesa ua komokele ngueni: ‘Na na ciyovo eci, nji suenako linga nji ka mone mua cili.’ Mu ku suenako ua vuile lizi mu ciputa ngualio: ‘Kati u suene kuno, sulula vinkaku viove, muomu u na mana ha cihela ca ku lela.’ Njambi ikeye ua kele na ku handeka neni ku hitila muli kangelo, ngeci Mosesa ua fuikile ku cihanga ceni.

Kaha Njambi ua handekele neni ngueni: ‘Nja mono kayando ka vantu vange va li ku Ingito. Kaha nji ka va patula, Yove nji ka tuma ku tuamenena vantu vange ku fuma ku Ingito.’ Yehova aka tuala vantu veni ku cifuti ca Kanana.

Vunoni Mosesa ua handekele ngueni: ‘Yange iya. Linga nji kayeko? Kaha nga nji ka yako, vaIsaleli va ka nji hula nguavo: “Iya na ku tumu?” Nji ka va kumbulula vati?’

Kaha Njambi ua mu kuaniene ngueni: ‘U ka va leka nguove, YEHOVA Njambi  ya Avilahama, Njambi ya Isake, na Njambi ya Yakomba, Ikeye na nji tumu.”’ Kaha Yehova ua vuezeleko ngueni: ‘Eli likelio lizina liange ku miaka yose.’

Kaha Mosesa ngueni: ‘Nga va ka viana nguavo kati Ikeye na ku tumu.’

Ngeci Njambi ua mu hulile ngueni: ‘Vika vili mu livoko liove?’

Kaha Mosesa ngueni: ‘Mulamu.’

Njambi ua mu lekele ngueni: ‘U mbile ha mavu.’ Mua u mbilile, ua himpukile linoka. Kaha Yehova ua muesele naua cikomoueso cikuavo kuli Mosesa ngueni: ‘Haka livoko liove ha ntulo yove. Omo Mosesa ua lingilemo, livoko lieni lia monekele ngue a li na musongo ua upi u va luka nguavo Mbumba. Kaha Yehova ua hele naua Mosesa ngolo ya ku linga cikomoueso ca mu citatu. Ku fumaho ua mu lekele ngueni: ‘Mu u ka linga evi vikomoueso, vaIsaleli va ka tava nguavo Yange nja ku tumu.’

Fume haze Mosesa ua hilukile kuimbo na ku leka Yetolo ngueni: ‘Nji tave linga nji hiluke ku va vusoko vuange ku Ingito nji ka mone vati vali.’ Yetolo ua tavele Ngeci Mosesa ua hilukile ku Ingito..