UA TANTEKEYA vika Noa ua lingile ha katete mua tuhukile mu vuato na vusoko vueni? Ua hele cikombelo ni nguetu vuana kuli Njambi. Ua mu mono mua li na ku linga cikombelo ceni ha fikula ili kuintsi. Noa ua hele vikombelo via tusitu mu ku santsela Njambi omo lia ku mu ovola na vusoko vueni ku livazi lia kama.

Mu ku singanieka cove cikombelo ceni ca ile Yehova ku mutima ni? Eyo. Ngeci ua kulahesele Noa ngueni kali ka nongesa naua mavu ku livazi.

Omo mavu ose omine, kaha Noa na vusoko vueni va putukile muono ua uha ku mbandza ya vuato. Njambi ua va vezikisile kaha ua va lekele ngueni: ‘Mua pande ku kala na vana va vengi noho mavu ose a sule na vantu.’

 Vunoni ku lutue lua ntsimbu, vantu mu ku ivua nguavo kua kele livazi lia kama, nga va vuile vuoma nguavo livazi li keza naua. Ngeci Njambi ua hele cuma cimo ce ku vuluisile vantu, cikulaheso ca handekele Njambi ngueni kali ka neha naua livazi lia ku nongese vantu vose. Ua tantekeya citantekeyeso cika ua va muesele ni? Ua va lekesele nkongolo.

Nkongolo ye ku soloka muilu nga niondzi i na ce, kaha litangua li tua. Vinkongolo via kala na mavala a engi a cili. Ua monaho laza nkongolo, ni? Aci tale eyi i li aha ha fikula!

Njambi ua handekele ngueni: ‘Nji na likuminia nguange na limo litangua liahi livazi li ka nongesa naua vantu vose na tusitu vose. Nji na haka nkongolo mu maselua. mu i ka soloka, Mu nji ka i mona kaha nji ka vuluka eli litavasiano liange.’

Nga u mona nkongolo, vika ua pande ku vuluka? Eyo, Njambi ua kulahesele ngueni ka ka nongesa naua vantu vose na livazi.