OMO mua hitile miaka ya ingi. Vana va Noa va semene vana va vengi, kaha vana vavo navo va semene naua vakuavo. Mu ntsimbu ya indende ha mavu ha kele vantu va vengi.

Kua kele umo uavo mutekuluila ua Noa lizina lieni Nimelonde. Ua puile muntu ua mupi, ua puile ciyambi, ua kele na ku tsiha tusitu na vantu. Nimelonde ua lipuisile muangana linga a sike vakuavo vantu. Njambi ka lemene Nimelonde.

Vantu vose va yoyele ku ntsimbu ize va kele na ku handeka lilimi limo lika. Nimelonde ua tondele ku kunguluila hamo vantu vose a va tumine. Ua tantekekeya vika ua lingile, ni? Ua tumine vantu va tunge mbonge ya kama kaha va tungilemo naua cimpaka ca laha. Tala ava vali aha ha fikula vali na ku songa vindopi.

Yehova Njambi ka viukilile ne ci ku tunga cavo. Njambi ua tondele linga vantu vose va lisanduoke na ku tunga ha mavu ose. Vunoni vantu va handekele nguavo: ‘Tuayenu! Tu tunge mbonge ya kama na cimpaka ca ku tuntuka, ntsongo yaco i ka hete muilu. Kaha tu ka tsimana!’ Vaze vantu va tondele ku litsimanesa vakevo vavene, kati ku tsimanesa Njambi.

 Ngeci Njambi ua lingisile vantu ku likela ku tunga cimpaka. Ua tantekeya vati Njambi ua lingile, ni? Ua lingisile vakua ku tunga ku handeka malimi a kuli seza-seza, kati naua lilimi limo houe. Vantu ka va kele na ku livuasiana umo na mukuavo. Ngeci mukemuo mbonge yaco va i lukile nguavo Mbambele ni Mbambilone lizina liaco lia lomboloka “Citanganeso.”

Kaha vantu va putukile ku lisanduoka ku tunda ku Mbambele. Vivunga via vantu va kele na ku handeka lilimi limo vose va putukile ku ka tunga ku vihela vieka via ha mavu.