TALA vintemo na mangongo a ku hia ana tuikilila oku ku mulamu. Ou mulamu ua Alone. Evi vintemo na vusuka vua mangongo a tuikililako mu vutsiki vumo! Tu ci tantekeye omo lia vika.

VaIsaleli va na heliangela mu zindinda imo ntsimbu. Vantu vamo ka va tondo nguavo Mosesa a pue ntuamena uavo, ambe Alone ka pandele ku pua sasendote ua kama. Kola, Ndatane na Avilame kaha na vantuamena 250 va ku vantu vakevo vali na visinganieka via cifua oco. Ngeci va neza kuli Mosesa nguavo: ‘Vika u na lihakela ku vukama helu lietu vose?’

Mosesa na kumbulula Kola na mbunga yeni 250, ngueni: ‘Mene cimene, tentulenu vitenga via tuhia na ku hakamo insensu. Kaha mu keza ku tavenakulu ya Yehova. Tu ka mone iya ya ka hangula Yehova.’

Lia mukuavo, Kola na mbunga yeni va neza ku tavenakulu. Ku neza naua vantu veka mu kua ku va kuasa. Yehova na tenuka cikuma. Kaha Mosesa ngueni: ‘Fumenu ku vimbalaka via ava vantu va vapi. Kati mu kuate ku vupite vuavo’. Vantu va na tava kaha va na fumu ha kati ka vimbalaka via Kola, Ndatane na Avilame.

Kaha Mosesa ua vuezako naua ngueni: ‘Hano hakeho ha mu ka tantekeyela iya ya na hangula Yehova. Livu li ka asama na ku lehula vose ava vantu va vapi.’

Mosesa a ci tule lizi, kaha livu li na asama. Vimbalaka na vupite vuose vua Kola, Ndatane na Avilame kaha na vantu vose va kele navo va sikulukile mu mavu kaha mavu a lifuika naua. Vantu omo va nevu miteto ya vaze va kele na ku sitama mu mavu, va tambekele nguavo: ‘Sondolokenuko! Ku tina va mi lehuile kumo!’

Kola na mbunga yeni 250 kasi va na mana ku hiehi na tavenakulu. Yehova na tumu tuhia, kaha tu na va tsimika vose. Kaha Yehova na leka Eleazale muana Alone a tentule vitenga via tuhia via vaze vamala va tsile kaha ua vi pasele na ku vi panga cifuiko ca mutula. Eci cifuiko ca mutula ci ka pua civuluiso ku vaIsaleli ca ku vuluka ngecize Alone na vana veni vakevo lika va na pande kupua vasasendote va Yehova.

 Vunoni Yehova a tonda ku muesa mpundu ngueni ikeye na hangula Alone na vana veni linga vapue vasasendote. Ngeci a leka Mosesa ngueni: ‘Handeka na vamiata va ku vindzivo via Isaleli va nehe milamu yavo, ku ndzivo ya va Levi, leka Alone linga a nehe mulamu ueni. Kaha haka milamu yose mu tavenakulu ku lutue lua cikasa ca litavasiano. Yala uose uze mulamu ueni u ka tuikilila vintemo ikeye i Nja hangula ku pua sasendote.’

Kaha omo Mosesa ua ileko lia mukuavo cimene, ua ka uanene mulamu ua Alone ua tuikilila vintemo na ku tuvula vintsani na ku ima mangongo a ku hia! Ua tantekeya honi omo lia vika Yehova ua lingisile mulamu ua Alone ku tuvula vintemo, ni?