TALA via li na ku sitika ou yala mu mbalaka yeni! Cikovelo ca cili na mukamo ua olu na vivalavala via palata. Na ka vi punda ku mbonge ya Yeliko. Vunoni vika va sikile nguavo vi va pandele ku linga na viuma via mu Yeliko? Ua vuluka ni?

Viose via tondekele nguavo va vi nongese, kaha nguavo olu na palata tele nguavo via pande ku pua vupite vua ku tavenukulu ya Yehova. Ava vantu va na vulumuna kuli Njambi. Va na pundu viuma via Njambi. Lizina lia yala ou ikeye Akane kaha vaze va a li navo va kua ndzivo yeni. Tu ci tale vati viendele.

Mu nima ya Akane ku punda evi viuma, Yehosua ua tumine vamo masualale ku ka lua ndzita na vakua Ayi. Vunoni va na ka vetuele. Vamo va tsile vakuavo va tinine. Kaha Yehosua ua vuile vusiua vua kama. Ua kotamena ha mavu na ku vundila kuli Yehova ngueni: ‘Vika ua tavesela viuma via ngecize ku tu solokela?’

Yehova na kumbulula ngueni: ‘Katuka! Isaleli na vulumuna. Va na ka punda viuma vize vi na pandele ku nonga kaha na vize via pandele ku vi tuala mu tavenakulu ya Yehova. Va na pundu cikovelo ca ku viuka kaha va na ci  sueka. Ka nji ka mi vezikisa ku vanga noho mu ka nongese viuma viaco na ku tsiha uze na vi pundile.’ Yehova ua handeka ngueni a ka lekesa Yehosua iya ou muizi uaco.

Ngeci Yehosua na kungulula vantu vose kaha Yehova ua tentulaho muizi uaco Akane. Kaha Akane ngueni: ‘Nja lingi vupi. Nja muene cikovelo ca ku viuka, na mukamo ua olu na vivalavala via palata. Nja vi lemene cikuma ngeci nja vi pundile. Mu ka vi uana nja vi sitika mu kati ka mbalaka yange.’

Omo va uanene viuma evi na ku vi tuala kuli Yehosua, kaha ua hulile Akane ngueni: ‘Vika ua tu kokela vukalu vua ku fua ngeci? Vuovuno Yehova a ku hisa!’ Kaha vantu vose va asangele Akane mavue na vakua ndzivo yeni ngeci va tsile. Eci ci tu longesa ngecize ka tua pandele ku nona viuma via mbala, ni vati?

Ku fuma haze vaIsaleli va hilukile naua mu ku lua na vakua Ayi. Amba vuose Yehova ua vezikisile vantu veni kaha va ka vulile ndzita yaco.