UA CI ivuaho laza cimulu a handeka ni? Halumo nguove: ‘Houe, vimuna ka ve ku handeka’. Vunoni mu Mbimbiliya va sonekamo via umo cimulu ua handekele. Tu cimone vati viendele.

VaIsaleli tele va li ku hiehi mu ku kovela mu cifuti ca Kanana. Mbalake muangana ua Moave a li na vuoma vua vaIsaleli. Ngeci a li na ku tuma linga va ka mu sanene umo yala ua mana lizina lieni Mbalame, linga a ku singe vaIsaleli. Mbalake na kulahesa ku hana zimbongo zia zingi kuli Mbalame, ngeci Mbalame na londa ha cimulu a li mu vungendzi vua ku ya kuli Mbalake.

Yehova ka tondo linga vantu veni va va singe kuli Mbalame. Kaha na tuma kangelo a li na mukuale ua laha linga a mane mu njila mu ku vindika Mbalame. Mbalame kesi na ku mona kangelo, vunoni cimulu ceni a li na ku mu mona. Kaha cimulu a tonda ku tina kangelo, vunoni kuahi kua ila, ngeci na vutama mu njila. Mbalame na niengua, ngeci a li na ku veta cimulu na mbueti.

 Kaha Yehova na lingisa Mbalame ku ivua lizi lia cimulu ku handeka. Kaha cimulu ua mu hula ngueni: ‘Vika vi nja ku pihisila vi u nji vetela ngecize?’

Ua mu kuania ngueni: ‘Muomu u na nji mono vusiname, nga na mukuale, nga nji na ku tsihi!’

Kaha cimulu ua mu hulile naua ngueni: ‘Nje ku linga-linga ngecize nove ni?’

Kaha Mbalame ngueni: ‘Houe’.

Kaha Yehova ua lingisile Mbalame ku mona kangelo na mana mu njila na mukuale. Kaha kangelo ngueni: ‘Vika ua vetela cimulu? Nji neza muku ku ku vindika linga kati u ye mu ku singa vaIsaleli. Nga cimulu cove ku tina mu njila kuahi, nga nja ku tsihi na ku seza cimulu cove’.

Kaha Mbalame ngueni: ‘Nji na vulumuna. Ka nja tantekeyele nguange yove una mana mu njila’. Kaha kangelo ua mueca ngeci Mbalame ua ile mu ku mona Mbalake. Kasi a ka eseka ku singa Isaleli, vunoni Yehova a ka mu lingisa ku vezikisa Isaleli lutatu.