OMO vaIsaleli va kovelele mu visoti, va vundilile kuli Yehova. Ngeci Yehova na va kuasa mu ku hangula vantuamena va ku simpa linga va vohiele. Mu Mbimbiliya va va luka nguavo vangazi. Yehosua ua puile ngazi ua katete kaha mu nima yeni mua hatele Oteniele, Ehunde, Samengale. Vunoni kuli vamo vantu vavali vampuevo ve ku kuasa Isaleli, mazina avo Ndevola na Yaele.

Ndevola ua puile kapolofeto ua mpuevo. Yehova ua mu hele mizimbu ku tuala ha vize viose vika soloka ku lutue. Ndevola neni ua pua ngazi. Ue ku tumama muintsi lia muti ua kankoma, ku mincinda kaha vantu va kele na kuiza kuli ikeye mu ku mu leka visoti viavo.

Ku ntsimbu ize Yavine ikeye ua puile muangana ua Kanana. Ua kele na masualale 900. Masualale veni va kala na ngolo ya kama cikuma ngeci vaIsaleli va vengi va va tengele vandungo va Yavine. Ntuamena ua masualale va Muangana Yavine lizina lieni Sisela.

 Tangua limo Ndevola ua sana Mbalake na ku leka ngueni: ‘Yehova na nji leka ngueni: “Hangula vamala vamo 10,000 kaha va tuamenene ku Muncinda ua Tavole. Kaha nji ka neha Sisela kuli ove. Kaha nji ka mu hana ku li ove na masualale veni”’.

Mbalake ua kumbuluile Ndevola ngueni: ‘Nji ka ya lika nga nove u tava kuya nange’. Kaha Ndevola ua tavele kuya, vunoni ua handekele ngueni: ‘Kati yove u ka vula ndzita muomu Yehova aka hana Sisela mu mavoko a mpuevo’. Kaha evi vikevio via solokele.

Kaha Mbalake ua sikulukile ku fuma ha Muncinda ua Tavole linga a ka liuane na Sisela. Haze vene Yehova ua nehele livazi, kaha masualale va vengi va Sisela va tsile. Vunoni Sisela ua londele mu litemba lieni ua tina.

Ua ka vandele ku mbalaka ya Yaele. Yaele ua mu laniene linga a kovele mu mbalaka kaha ua mu hele mavisi a nue. Aze mavisi a nuine a mu kokelele tulo ngeci ua kosele. Kaha Yaele ua tentuile imo mbambo na ku i pangeya mu mutue ua uze yala ua ku pihia. Mu nima ya ntsimbu Mbalake uezile, ua mu lekesa civimbi ca Sisela! Ngue mu tu na mono, via handekele Ndevola via lipuisilemo.

Mu ku manusuila, Muangana Yavine neni va mu tsihile, kaha vaIsaleli va yoyele naua mu ciyulo mu ntsimbu ya indende.