TALA ou linoka uva na zenga-zenga ku citi, ngue ua cili ni vati? Vunoni kati linoka mpundu. Ou linoka ua ku panga na nkengelezi. Yehova ua lekele Mosesa a mu hake ku citi, linga vantu va taleko kaha kati va tse. Vunoni ava va li ha mavu manoka mpundu. Va na sumu vantu na ku va sila vusungu vuze vu li na ku va vuisa ku vavala. Ua tantekeya oma lia vika?

Muomu vaIsaleli va na sahula Njambi na Mosesa. Va li na ku linienga nguavo: ‘Vika mua tu fumisila mu Ingito linga tua ku tsile muno mu zindinda? Ka muesi via-ku-lia na mema. Ka tu tondo naua ku lia manna.’

Vunoni manna ya puile via-ku-lia via cili. Yehova ua kele na ku va hanayo ku hitila mu cikomoueso. Kaha ua va hele naua mema ku hitila mu cikomoueso. Vunoni ava vantu ka va santselele Njambi omo lia viuma viose evi via na va lingila. Ngeci Yehova na tumu manoka va vusungu linga va sumange vaIsaleli. Ngeci manoka va li na ku va suma, cingi cavo va li na kutsa.

 Amba vuose vantu va li na kuiza kuli Mosesa na ku handeka nguavo: ‘Tua vulumuna, muomu tu na mi sahula ove na Njambi. Tu vundilileko kuli Yehova linga a fumise ava manoka.’

Kaha Mosesa ua putuka ku vundilila vantu. Ngeci Yehova na tumu Mosesa ku munga linoka ua nkengelezi. Kaha ua leka Mosesa ku mu sukika ha muti, linga uose uze iva na sumu a taleko. Kaha Mosesa ua panga ngue muze mua mu sikile Njambi. Kaha vaze vantu va va sumine, va talele ku linoka va uanene ku ovoka.

Eci ci na pu cilongesa kuli yetu. Tu vose tua kala mu cifua ngue cize ci va kele vaIsaleli va va sumine ku manoka. Vantu vose ve ku kola, ku kulupa na ku tsa. Muomu yala na mpuevo va ku livanga, Andama na Eva, va vianene Yehova, kaha tu vose tu vana vavo. Vunoni Yehova na asiuisa viuma linga netu tu ka hase ku yoya miaka yose.

Yehova ua tumine Muaneni Yesu Kilistu ha mavu. Yesu va mu sukikile ha citi muomu vantu vavengi va singaniekele nguavo mukua vupi. Vunoni Yehova ua hele Yesu linga tu vose tu ka uane ku ovoka. Nga tu tala kuli ikeye na ku mu ka va kaha tu hasa ku ka tambula muono ka ue ku hua. Tu ka lilongesa via vingi ha vimpande evi ku lutue.