UO HUE! Vika va linga ava vantu? Va li na ku va lemesa ngombe! Omo lia vika?

Omo Mosesa na ka simbula cikuma ku muncinda, vantu va na handeka nguavo: ‘Ka tua tantekeyele vika via solokela Mosesa. Tu pangenu umo njambi linga a tu fumise mu cihela cino.’

Kaha Alone muanaye ya Mosesa ua handekele ngueni: ‘Mukemuo. Nehenu kuno tundzeya tua ku matuitui enu’. Kaha omo vantu mu va mu hele, Alone ua sangunuine tundzeya na ku panga ngombe ua olu. Ngeci mukemuo vantu va handekele nguavo: ‘Ou ikeye Njambi yetu, ua tu patuile ku cifuti ca Ingito!’ Kaha vaIsaleli va lingile cilika ca kama ca ku lemesa ngombe ua olu.

Omo Yehova na vi mono, na tenuka cikuma. Ngeci na leka Mosesa ngueni: ‘Sikumuka vuasi-vuasi. Vantu va li na ku linga vupi vua kama. Va na suvu masiko ange vali na ku lemesa ngombe ua olu.’

 Mosesa na sikumuka vuasi-vuasi ku muncinda. Omo na suena ku hiehi na mono vantu va li na kuimba na ku cina oku va zenguluka ngombe ua olu! Mosesa na tenuka cikuma ngeci na mbila vitale vivali via masiko, ngeci via tavuzioka mu vivalavala via vingi. Kaha na kuata ngombe ua olu na ku mu sangununa. Kaha na mu tu uose ngue vunga.

Ava vantu va na lingi viuma via ku pihia cikuma. Ngeci Mosesa na leka vamo vamala linga va suele mikuale yavo. Kaha ngueni: ‘Vantu va vapi vose va na lemesele ngombe ua olu va na pande ku tsa.’ Ngeci mukemuo vaze vamala va na tsihi vantu va ku pua 3.000! Eci ci tu longesa ngecize tua pande ku zangama linga tu lemese lika Yehova, kati vanjambi va makuli, ni vati?