MOSESA a tonda ku ka kovela mu Kanana hamo na vaIsaleli. Ngeci na vundila ngueni: ‘Yehova nji tave nji zavuke Ndonga ya Yondau linga nji ka mone cifuti ca cili.’ Vunoni Yehova ngueni: ‘Kunahu! Kati u hilukilemo naua ku handeka ngoco!’ Vika Yehova na mu kumbuluila ngecize?

 Omo lia vize via lingile Mosesa mua vetele ha livue. Vuluka nguove Mosesa na Alone ka va ononokele kuli Yehova. Ka va muesele ku vantu nguavo Yehova ikeye ua tuhuisile mema mu livue. Ngeci mukemuo Yehova ua va lekele ngueni ka va ka kovela mu Kanana.

Mu nima ya vingonde via vindende, fume ha ku-tsa ca Alone, Yehova ua lekele Mosesa ngueni: ‘Tentula Yehosua, mu tumbike ku meso a Eleazale sasendote na ku meso a lukungulukilo luose, kaha ikeye a ka pua ntuamena ua muha’. Mosesa ua lingile muose mua mu tumine Yehova, ngue mu u na mono aha ha fikula.

Kaha Yehova ua lekele Yehosua ngueni: ‘Lisimpitike na ku kolesa kati u ivue vuoma. U ka tuala vaIsaleli ku cifuti ca Kanana ci nja va kulahesa.’

Mu nima ya ntsimbu, Yehova na handeka na Mosesa a londe helu lia Muncinda ua Nevo, mu cifuti ca Moave. Kaha kuze kuilu lia muncinda Mosesa na hasa ku mona Ndonga ya Yondau na cifuti ca cili ca Kanana. Kaha Yehova ngueni: ‘Eci cikeco cifuti ci nji na kulahesa ku hana vana va Avilahama, na va Isake, na va Yakomba. Nji na ku lekesaco lika, vunoni ka u ka kovelamo.’

Kuze vene kuilu lia Muncinda ua Nevo kukekuo kua tsililile Mosesa. Tele na puisa miaka 120. Tele a ci li na ndzili na meso eni oku a mona mua cili. Vantu va li na vusiua vua kama, va lila ku tsa ca Mosesa. Vunoni va na viukilila muomu va li na ntuamena ua muha Yehosua.