UA TANTEKEYA vika va li na ku nonongola ava vantu ha mavu, ni? Vi moneka ngue mema a ku konda. Vi toka ngue civue. Vunoni kati civue, via-ku-lia.

Mua hiti lika ngonde imo fume ha va na patukila vaIsaleli mu Ingito. Va li mu zindinda. Via-ku-lia via vindende vie kuimamo, ngeci vantu va na putuka ku linienga nguavo: ‘Nga Yehova ua tu tsihile tele tu ci li mu Ingito. Muomu kuze tua kele na via-ku-lia viose vi tua tondele.’

Kaha Yehova ngueni: ‘Nji ka nokesa via-ku-lia via ku fuma muilu’. Mukemuo mua na lingi Yehova. Lia mukuavo cimene, omo vana va Isaleli va na mono evi viuma via ku toka vi na u muilu, va li na ku li hula umo na mukuavo nguavo: ‘Vika evi?’

Kaha Mosesa ngueni: ‘Evi vikevio via-ku-lia via na mi hie Yehova’. Vantu va na vi luku nguavo MANNA. Ku vi makela ngue mbolo ya ku panga na vuci.

Mosesa ua va leka ngueni: ‘Kungenu muntu ku muntu ngue mu ku-lia ceni lika’. Ngeci vantu va lingilemo cimene ku cimene. Kaha mu lia tuile litangua, manna a lisupile ha mavu a sangunukile.

Mosesa ua va lekele naua ngueni: ‘Na umo uahi na pande ku kunga manna ku puisa mu matangua avali.’ Vunoni vantu vamo ka va mu halakanene. Ua tantekeya vika via solokele? Lia mukuavo cimene, ize ya lisupileho ya sulile na tulongolo kaha ya putuka ku nika!

Vunoni kuli litangua limo mu sumano, Yehova na sika vantu linga va kunge manna ya matangua avali. Litangua liaco, lia mu citanu na limo. Yehova na va leka va linge ngoco muomu, litangua lia mu citanu na avali ka ka nokesa manna. Mu va na kungu ya litangua lia mu citanu na avali, ka ya sulile na tulongolo cipue ku nika! Eci cinapu cikomoueso cikuavo!

Miaka yose i va kele vaIsaleli mu zindinda, Yehova ua va sukile na manna.